عێراق: چاوەڕێی تورکیاین بۆ هەناردەکردنەوەی نەوتی کوردستان

ئاڤا نیوز

وەزیری نەوتی عێراق ڕایدەگەیێنێت، هەناردەکردنەوەی نەوت لە کێڵگە نەوتییەکانی هەرێمی کوردستان لە ماوەی هەفتەیەکدا دەستپێدەکاتەوە و ئاماژە بۆ ئەوەش دەکات کە ئەوان چاوەڕێی ڕەزامەندی لایەنی تورکیان.

 

وێنە گەورەکە: دوای پەسندکردنی هەمواری یاسای بودجە دواتر هەماهەنگی نێوان وەزارەتی نەوتی عێراق و وەزارەتی سامانە سرووشتییەکان هەرێمی کوردستان، ڕێککەوتن لەبارەی دەستپێکردەوەی هەناردەکردنەوەی نەوتی کوردستان کرا.

 

لێدوانی فەرمی: حەیان عەبدولغەنی، وەزیری نەوتی عێراق لەوەڵامی وادەی دەستپێکردنەوەی هەناردەی نەوت لەهەرێمی کوردستانەوە ڕایگەیاند: ئەو بابەتە لە ماوەی ئەو هەفتەیە یەکلایی دەبێتەوە و  ئاماژەی بەوەشدا، عێراق چاوەڕێی ڕەزامەندی تورکیا دەکات بۆ دەستپێکردنەوەی پەمپکردنی نەوت و هیوادارین لە ماوەی دوو ڕۆژدا هەناردەکردنی نەوتی کوردستان ئامادەبێت.

 

لەلایەکی دیکەوە: پەیوەست بە کاریگەریی هەناردەکردنەوەی نەوتی هەرێمی کوردستان لەسەر پابەندبوونی بەغدا بە بڕیارەکانی ئۆپێک، وەزیری عێراق ڕایگەیاند، وڵاتەکەی پابەندە بە بڕیارەکانی ئۆپێک و بڕی هەناردەکراو لەژێر کۆنترۆڵی وەزارەتدایە. بەگوێرەی ئاژانسی ڕۆیتەرز.

 

بە تەنیشت ئەم بابەتەوە: هەر ئەمڕۆ وەزارەتی نەوتی عێراق لە ڕاگەیێنراوێکدا پابەندیی خۆی بە ڕێککەوتنی ئۆپیک پڵەس بۆ کەمکردنەوەی هەناردەی نەوت و پاراستنی نرخی وزە لەگەڵ دەستپێکردنەوەی هەناردەی نەوتی هەرێمی کوردستان دووپات کردەوە.