پەرلەمانتارێكی ئیسرائیل: نەتانیاهۆ لەلایەن كوڕەكەی لێی دراوە

 

ئاڤا نیوز

پەرلەمانتارێكی ئیسرائیل ئاشكرای دەكات، كوڕەكەی بنیامین ناتانیاهۆ لە باوكی داوە و دوای ئەو ڕووداوەش بۆ دەرەوەی وڵات دوورخراوەتەوە.

چیرۆكی سەرەكی: بەگوێرەی میدیا ئیسرائیلییەكان، ئەمڕۆ دووشەممە 2025-02-24، یائیر كوڕی بنیامین ناتانیاهۆ، سکاڵای یاسایی لەسەر پەرلەمانتار نەعما لازیمی، تۆمارکردووە، بەتۆمەتی ئەوەی ناوی زڕاندووە و لەڕێگەی میدیاكانەوە دەنگۆی ئەوەی بڵاوكردۆتەوە كە لە باوكی داوە بۆیە ڕەوانەی ئەمریكا كراوە.

زانیاریی زیاتر: یائیر لە سکاڵاكەیدا داوای قەرەبووی دارایی بە بڕی 300 هەزار شیکڵ کە دەکاتە نزیکەی 84 هەزار دۆلار كردووە.

لێدوانی فەرمی: نەعما لازیمی، ئەندامی كنێستی ئیسرائیلی لە كۆبوونەوەی لیژنەی دارایی پەرلەمانی ئیسرائیل ڕایگەیاندووە، یائیر ناتانیاهۆ دوای ئەوەی هێرشی کردووەتە سەر باوکی و لێی داوە لە ئیسرائیل دوور خراوەتەوە.

ئەو پەرلەمانتارە ئەوەشی باسكردووە كە كوڕەكەی نەتانیاهۆ دوای ئەوەی لە باوكی داوە و ڕەوانەی ئەمریكا كراوە، ئێستا لەلایەن حكومەتەوە خەرجی مانەوەی لە ویلایەتی میامی لە ئەمریكا، دابین دەكرێت و داوای كردووە لیژنەی دەستپاكی پەرلەمان بەدواداچوون بۆ ئەو بابەتە بكات.

لەلایەكی دیكەوە: کەناڵی 14ـی ئیسرائیل لە زاری پارتی دەسەڵاتداری لیکۆد، کە پارتەکەی ناتانیاهۆیە ڕایگەیاندووە، ئەوەی لازیمی گوتوویەتی، "ڕاست نییە و مەبەستیەتی ناوی سەرۆكوەزیران بزڕێنێت".