فایلی خەڵک؛ ئاڤا بەدواداچوون بۆ گرفتێكی تاقیكردنەوەكانی تەمهیدی دەكات

 

ئاڤا نیوز

ژمارەیەك قوتابیی لە شارۆچكەكانی كەڵەك و قەزای بەردەڕەش، تاقیکردنەوەی تەمهیدی پۆلی 12ـی ئامادەیی دەدەنەوە و دەرناچن بەو پێیەی خوێندنیان بە زاراوەی سۆرانی بووە و پرسیارەکان بە زاراوەی بادینی هاتۆتە بەردەمیان و تێنەگەیشتوون.

وێنە گەورەكە: دوێنی یەكشەممە 2025-02-23، تاقیكردنەوەی بەرایی (تەمهیدی) پۆلی 12ـی ئامادەیی ئەمساڵی خوێندن دەستیپێكرد، لە بەشی زانستی تاقیكردنەوەی زیندەزانی هەبوو، لە بەشی وێژەییش تاقیكردنەوەی وانەی مێژوو بوو.

گرفتەكە چییە: یەكێك لەو قوتابیانە دەڵێت، من هەمیشە بە زاراوەی سۆرانی خوێندوومە، كەچی پرسیارەکانی تاقیکردنەوەی تەمهیدی بە زاراوەی بادینی هاتۆتە پێشم ئەوەش گرفتم بۆ دروست دەكات و لە تاقیكردنەوەكان دەرناچم، داوای كردووە لەڕێگەی لایەنی پەیوەندیدارەوە چارەسەری ئەو گرفتە بكرێت كە هەروەك چۆن تاقیکردنەوەی وزاری بە زاراوەی سۆرانیە، بەهەمان شێوەش تاقیکردنەوەکانی تەمهیدی (بەرایی) بە زاراوەی سۆرانی بێت.

لێدوانی فەرمی: هەردی مەعرووف، بەڕێوەبەریی ئەزموونەكان لە وەزارەتی پەروەردە بە ئاڤای میدیای ڕاگەیاند: ئەوانە 11 قوتابی بوون كە ئەو گرفتەیان هەبووە و دوای ئەوەی گرفتەكەیان گەیاندۆتە پەروەردەی بەردەڕەش، فایلی تاقیكردنەوەی تەمهیدییان بۆ پەروەردەی ناوەندیی هەولێر گواستراوەتەوە و لەسەر داوای خۆیان ئێستا بە زاراوەی سۆرانی وەڵامی تاقیکردنەوەکان دەدەنەوە، تەنیا یەك قوتابی لەو بڕیارە زەرەرمەند بووە بەو پێیەی ئەویان پێچەوانەی هاوڕێكانی، خوێندنی بە زاراوەی بادینی بووە و لەكاتی گواستنەوەی فایلەكەی بۆ پەروەردەی هەولێر، یەكەم تاقیكردنەوەی تەمهیدی كە دوێنێ بووە، پرسیاری تاقیکردنەوەکانی بە زاراوەی سۆرانی بۆ هاتووە و دووچاری گرفت بووە.

زانیاریی زیاتر: ئاڤا ئەو بەڵێنەی لە بەڕێوەبەری ئەزموونەكان وەرگرتووە كە گرفتی ئەو قوتابییەش چارەسەر بكەن و كاربكەن بۆ دووبارەكردنەوەی تاقیكردنەوە لەو وانەیەی دوێنێ.