كەسانێك لە تۆڕە كۆمەڵایەتییەكان بە ساختە خۆیان وەك دەروونناس دەناسێنن

ئاڤا نیوز

کۆمەڵەی پزیشکیی دەروونیی کوردستان ڕایدەگەیەنێت، سکاڵای یاسایی لەسەر ‎هەموو ئەو کەسانە تۆمار دەکات کە بەبێ بڕوانامە خۆیان وەکو پزیشك و پسپۆڕی دەروونی ناساندووە، هاوكات پسپۆڕانی دەروونی و كۆمەڵناسی ئاگادار دەكاتەوە لە فێڵی باندێك كە بەساختە هەڵساون بە نوێكردنەوە و دروستكردنی ناسنامە بۆ دەروونناسان.

چیرۆكی سەرەكی: لەماوەی ڕابردوودا كەسانێك لەڕێگەی تۆڕە كۆمەڵایەتییەكانەوە وەك پزیشك و پسپۆڕی دەروونناسی خۆیان ناساندووە و بەشێوەی گرووپی ڕێكخراو هەڵساون بە دروستكردن و نوێكردنەوەی ناسنامەی دەروونناسان بۆ خۆیان و كەسانی دیكە، هاوكات لینكی فەیك و ژمارەی هەڵەیان بۆ چەند كەسێك ناردووە و دواتر هاكیان كردوون.

ڕاگەیێنراوی فەرمی: کۆمەڵەی دەروونناس و كۆمەڵناسانی کوردستان لە ڕاگەیەنراوێکدا ئەوەی خستووەتەڕوو، "لەم ماوەی دواییدا خەڵکانێکی زۆر لە تۆڕە کۆمەڵایەتییەکان ناشارەزایی هاووڵاتیانیان لەبواری دەروونی قۆستووەتەوە و خۆیان وەک پزیشک و پسپۆڕی دەروونی ناساندووە، تا ئەو ڕادەیەی بابەتەکە لە حاڵەت دەرچووە و بووەتە دیاردە."

چی ڕوودەدات: كۆمەڵەی پزیشكانی دەروونی لەپێناو پاراستن و دوورخستنەوەی مەترسی لەسەر تووشبووانی نەخۆشییە دەروونییەكان، بەنیازە سكاڵا لەسەر هەموو ئەو كەس و باندانە تۆماربكات كە خۆیان بە پزیشك و پسپۆڕی دەروونی ناساندووە و هەڵگری هیچ جۆرە بڕوانامەیەکی باوەڕپێکراو نین لەم تایبەتمەندییەدا. ئەمەش دوای زیادبوونی سەرهەڵدانی ئەم دیاردەیە و پێشکەشکردنی چارەسەری نادروست و نازانستی بە چارەخوازان.

زانیاریی بەدەستهاتوو: كۆمەڵەی پزیشكانی دەروونی لەڕێگەی لیژنەی مافی گشتی لە دەزگای داواكاری گشتی بەنیازە سكاڵای یاسایی لەسەر ئەو كەس و باندانە تۆماربكات، داواش لە هاووڵاتیان دەكات بە ڕێكلامی نافەرمیی تۆڕە كۆمەڵایەتییەكان هەڵنەخەڵەتێن و نەكەونە داوی ئەو كەسانەوە.