وەزیری پلاندانانی عێراق: سەرژمێری بۆشیاییەکی گەورەمان بۆ پڕدەکاتەوە

ئاڤا نیوز

وەزیری پلاندانانی عێراق ڕایدەگەیەنێت، دەستخستنی داتا بەشێوەی دیجیتاڵی ئاسانكاریی پێویست بۆ حكومەت دەكات بۆ پڕكردنەوەی ئەو بۆشاییەی لە بواری پەرەپێدان هەبوو. هاوكات لە دابەشكردنی داهات بەپێی نەخشەی نوێی دیمۆگرافی ڕۆڵی سەرەكی دەبێت.

وێنە گەورەکە: ئەمڕۆ 24-2-2025، بە ئامادەبوونی نوێنەرانی نەتەوە یەکگرتووەکان و وەزارەتی پلاندانانی حکومەتی هەرێمی کوردستان، وەزارەتی پلاندانانی عێراق دەرئەنجامی فەرمیی یەکەم سەرژمێریی دانیشتووانی دوای 37 ساڵ ڕاگەیاند، بەگوێرەی دەرئەنجامەكەش ئێستا ژمارەی دانیشتووانی عێراق 46 ملیۆن و 118 هەزار کەس و 793 کەسە.

لێدوانی فەرمی: د. محەممەد تەمیم، وەزیری پلاندانانی عێراق لە كۆنفراسێکی ڕۆژنامەوانیی ڕایگەیاندن، "عێراق دوای نزیكەی چوار دەیە بۆ یەكەمجار توانی سەرژمێرییەكی ئەلیكترۆنی بەشێوەی دیجیتاڵی ئەنجام بدات كە دەستخستنی ئەو داتایانە ئاسانكاریی پێویستمان بۆ دەكات بۆ پڕكردنەوەی ئەو بۆشاییانەی لەبواری پەرەپێدان هەبوو."

بۆچی گرنگە: بەهۆی دەستكەوتنی زانیاریی وردی ژمارە و چڕی دانیشتووان، حكومەت دەتوانێت دادپەروەری لە دابەشكردنی داهات بەپێی چڕی دانیشتووان لە پارێزگاكان پیادە بكات و نەخشەیەكی نوێی دیمۆگرافی بكێشێت.

ئەوەی پێویستە بیزانیت: بەهۆی ئەوەی یەكەمجارە سەرژمێریی دانیشتووان بە سیستمی دیجیتاڵی بكرێت، ئەو سەرژمێرییە دەبێتە بنەما بۆ تەواوی ئەو سەرژمێرییانەی لە ئایندە ئەنجام دەدرێت و داتاكان بەپێی ساڵەكان نوێ دەكرێتەوە.

ئەمەش بزانە: وەزیری پلاندانانی عێراق ڕوونیشی كردەوە، "واقیعی پەرەپێدان لە عێراق دوای ئەو سەرژمێرییە زۆر جیاواز دەبێت بەراورد بەپێشوو، ئاماژەكانی گەشەسەندنی دانیشتووان و هەڵكشانی ژمارەی خێزانەكان و كەرتی بیناسازی و ئاوەدانی و دامەزراوەكان و چالاكییە ئابوورییەكان و دەسكەوتنی ئاماری وردی تەمەن و ڕەگەز و ئاستی خوێندەواری و خاوەن كار و ئافرەتانی ماڵەوە و بێكاران جیاكردنەوەی ئاماری هەموو ئەو بەشانە وادەكات كارئاسانیمان بۆ بكات لەبواری پەرەپێدان و گەشەپێدانی وڵات."