ئیسرائیل پێگەکانی سوپای سووریا لە دیمەشق و باشووری وڵاتەکە بۆردومان دەکات

ئاڤا نیوز

دوای ڕاگەیێنراوەکەی دوێنێی کۆنگرەی نیشتیمانی سووریا بۆ سەرکۆنەکردنی لەشکرکێشییەکان، شەوی ڕابردوو ئیسرائیل لە دیمەشق و باشووری سووریا ژمارەیەک پێگەی سەربازیی سوپای سووریای بۆردوومانکرد، جەختیشیکردەوە کە ڕێگە نادات باشووری سووریا ببێتە باشووری لوبنان و هەڕەشەبێت لەسەر ئاسایشی ئیسرائیل.

وێنە گەورەکە: دوێنێ بە ئامادەبوونی ئەحمەد شەرع، سەرۆککۆماری سووریا بۆ قۆناغی ڕاگوزەر، کۆنگرەی نیشتمانی سووریا بەبێ بەشداری کورد بەڕێوەچوو و یەکێک لە ڕاسپاردەکانی کۆنگرەکە بریتیی بوو لە داواکردنی کشانەوەی ئیسرائیل لە سووریا و ڕەتکردنەوەی پارچە پارچەکردنی خاکی وڵاتەکە.

ڕاگەیێنراوی فەرمی: سوپای ئیسرائیل بڵاویکردەوە، شەوی ڕابردوو چەند پێگەیەکی سەربازییان لە باشووری سووریا کردووەتە ئامانج، کە بریتی بوون لە بنکە و بارەگا کە چەکیان تێدابووە، بوونی چەک و هێزی سەربازیش لە باشووری سووریا هەڕەشەیە بۆسەر ئیسرائیل و بۆ ڕەواندنەوەی ئەو هەڕەشانەش هەموو ڕێکارێک دەگرینەبەر.

لێدوانی فەرمی: یسرائیل کاتس، وەزیری بەرگریی ئیسرائیل ڕایگەیاند، ڕێگەنادەن باشووری سووریا ببێتە باشووری لوبنان و لەڕێگەیەوە هەڕەشە بۆسەر ئیسرائیل دروستبکات.

زانیاریی زیاتر: هێرشەکانی شەوی ڕابردووی ئیسرائیل، فیرقەی یەکەمی سەر بە سوپای پێشووی سووریای لە ناوچەی کەسوەی باشووری دیمەشق بە ئامانج گرت، هاوکات لە ڕۆژئاوای دەرعا هێرشکراوەتەسەر چەند پێگەیەکی سەر بە وەزارەتی بەرگریی سووریا، لە سنوری کارگێڕیی پارێزگاکانی دەرعا و قونەیتەرەی باشووری سووریاش، هێزەکانی ئیسرائیل لە ئاستی زەمینیی پێشڕەویانکردووە.