یاسای لێبووردن ژمارەی زیندانیکراوانی عێراق بۆ 50% کەمدەکاتەوە

ئاڤا نیوز

ئەندامێکی لیژنەی ئاسایش و بەرگری لە پەرلەمانی عێراق دەڵێت، بە جێبەجێکردنی یاسای لێبووردنی گشتی ژمارەی زیندانیکراوان 50% کەمدەبێتەوە، ئەوەش فشار لەسەر زیندانەکان و خەرجییەکانی دەوڵەتیش کەمتر دەکاتەوە.

وێنە گەورەکە: یاسای لێبووردنی گشتی دوای پەسەندکردنی لە پەرلەمانی عێراق، لە ناوەڕاستی ئەم مانگەوە کەوتووەتە بواری جێبەجێکرنەوە، یاساکە خواستی سەرەکی سوننەکان بوو و باوەڕیان وایە بەهۆیەوە ئەوانەی بەبێ تاوان زیندانیکراون، ئازاد دەکرێن.

لێدوانی فەرمی: عەلی بەنداوی، ئەندامی لیژنەی ئاسایش و بەرگری لە پەرلەمانی عێراق ڕایگەیاند:

٠ ئێستا یاسای لێبووردن کەوتووەتە بواری جێبەجێکردنەوە و پرۆسەی وردبینیی لە دۆسییەی زیندانییکراوان دەکرێت، چاوەڕێش دەکرێت لەماوەی مانگێکدا بەرەبەرە ژمارەی زیندانیکراوان کەمببێتەوە.

٠ لێبووردنی گشتی گرووپە تیرۆرستییەکان و ئەوانە ناگرێتەوە کە دەستیان بە خوێن سوور بووە، بەڵکو لێبووردن ئەوانە دەگرێتەوە کە لەسەر پارە و قەرز یان تاوانی بچووک حوکمدراون.

٠ ژمارەی حوکمدراوان لە زیندانەکان بەڕێژەی 40% تا 50% کەمدەبێتەوە، ئەوەش فشار لەسەر زیندانەکان و خەرجیش لەسەر دەوڵەت بۆ چاودێریکردنی زیندانەکان و دابینکردنی پێداویستییەکان کەم دەکاتەوە