فایلی خەڵک؛ ئاڤا بەدواداچوون بۆ پارەی کارمەندانی ڤێتێرنەری دەکات

ئاڤا نیوز

ئاڤا بەدواداچوون بۆ پارەی کارمەندانی ڤێتێرنەری سەردەمی تای خوێنبەربوون دەکات کە تاوەکو ئێستا پارەکانیان بۆ خەرج نەکراوە. لەوبارەیەوە ڤێتێرنەری سلێمانی دەڵێت، پارەکە لای ئێمە نییە و دراوە بە کۆمپانیایەک.

وێنە گەورەکە: بەر لە دووساڵ پەتای تای خوێنبەربوون بڵاوبووەوە کە ئەم پەتایە لە ئاژەڵەوە بۆ مرۆڤ دەگوازرێتەوە، بۆ ڕێگریگریکردن لە تەشەنەسەندنی پەتاکە، حکومەتی هەرێمی کوردستانی چەند ڕێکارێکی جێبەجێ کرد.

ئەوەی پیویستە بیزانیت: یەکێک لەو ڕێگایانەی کە گیرایەبەر، ڕشاندنی گەوڕی مەڕ و ماڵاتەکان بوو، ئەوەش بە تەندەر درایە کۆمپانیایەک تا دەرمانی پێویست بهێنێت، کارمەند و  ئۆتۆمبێلی پێویست دابین بکەن.

بابەتە ستراتیژییەکان: ژمارەیەک لەو کارمەندانە داوایان لە ئاڤا کرد بەدواداچوونیان بۆ بکرێت، چونکە لەمانگی 9ـی 2023 ـەوە ڕۆژانە 25 هەزار و بۆماوەی مانگێک لەگەڵ کارمەندانی ڤێتێرنەری دەرچوون، بەڵام تاوەکو ئێستا نە ئەو پارەیە نە پارەی کرێ ئۆتۆمبێلیان بۆ خەرج نەکراوە.

لێدوانی فەرمی: ئاری سەڵاحەددین، بەڕێوەبەری ڤێتێرنەری پارێزگای سلێمانی بە ئاڤای گوت، "ئێمە بەردەوام لەسەر هێڵین بۆ خەرجکردنی ئەو خەرجییە، بەڵام پارەکە لای ئێمە نییە و دراوە بە کۆمپانیایەک دەبێت ئەوان خەرجی بکەن."

لەلایەکی دیکەوە: ئاڤا لەگەڵ بەڕێوەبەری کۆمپانیاکە قسەی کرد،ئەو گوتی، "ڕەزامەندی ئەنجوومەنی وەزیران لەسەر خەرجکردنی پارەکە هەیە و چەکمان بۆ کراوە کە تێچووەکەی دوو ملیار و نیوە، بەڵام کە چەکەکە دەبەینە لقی بانکی هەرێم لە هەولێر خەرجی ناکەن و دەڵێن، دەسەڵاتی خەرجکردنمان سنووردارە و ناتوانین چوار ملیۆن زیاتر خەرج بکەین."