وەزارەتی دارایی: لیستی مووچە ئامادەیە

ئاڤا  نیوز

 

وەزارەتی دارایی و ئابووریی هەرێمی کوردستان لیستی مووچەی ئامادەکردووە، کە لە 44 خانە پێکدێت و بە زمانی عەرەبی پڕكراوته‌وه‌، ئێستا ئامادەیە تاوەکو ڕەوانەی بەغدا بکرێت. 

 

بۆچی گرنگە: دوای ڕەوانەکردنی لیستی مووچە بۆ بەغدا، وەزارەتی دارایی عێراق ڕاستەوخۆ دەست بە ناردنی مووچەی مووچەخۆرانی هەرێمی کوردستان دەکات. 

 

لێدوانی فه‌رمی:  مەولوود سابیر، بەڕێوەبەری بانکە بازرگانییەکانی هەرێمی کوردستان بە ئاڤا نیوزی گوت: وەزارەتی دارایی و ئابووری ڕایگەیاند: لیستی مووچەی سەرجەم فەرمانگە و وەزارەتەکانی هەرێمی کوردستان بە زمانی عەرەبی ئامادەکراوە، بۆ ڕەوانەکردنی بۆ بەغدا، كه‌ لە 44 خانە پێکدێت‌، سەرجەم زانیارییەکانی فەرمانبەر و دەرماڵە و لێبڕینەکانی تێدایە. 

 

لەلایەکی دیکەوە: هونەر جەمال، گوتەبێژی وەزارەتی دارایی و ئابووریی پشتڕاستی کردەوە کە لیستی مووچەی مووچەخۆران ئامادەیە، تەنیا وردبینیکردنی ماوە، پاشان ڕەوانەی بەغدا دەکرێت.

 

باكگراوند: بڕیارەکەی دادگەی فیدراڵیی عێراق کە 21-02-2024 دەرچوو، هەردوو حکومەتی فیدراڵی و هەرێمی کوردستان پابەند دەکات بە دابینکردنی مووچەی مووچەخۆرانی هەرێمی کوردستان هاوشێوەی مووچەخۆرانی پارێزگاکانی عێراق.