ئاكپارتی: نەك تەنیا لە عێراق، پێویستە پەكەكە لە سووریاش خۆی هەڵبوەشێنێتەوە

 

ئاڤا نیوز

وتەبێژی پارتەكەی ئەردۆغان داوا دەكات، سەرجەم ئەو گروپ و لایەنانەی سەر بە پەكەكەن لە توركیا و عێراق و سووریا، پابەندی پەیامەكەی عەبدوڵڵا ئۆجەلان بن و بەبێ مەرج چەك دابنێن و خۆیان هەڵبوەشێننەوە.

 

وێنە گەورەكە: ئێوارەی ڕۆژی پێنجشەممە 2025-02-27، پەیامی عەبدوڵڵا ئۆجەلان، ڕێبەری زیندانیکراوی پەکەکە لەڕێگەی ئەندامانی شاندی ئیمرالی بڵاوكرایەوە كە داوایكرد، پەكەكە چەک دابنێت و خۆی هەڵبوەشێنێتەوە و کۆنگرە ببەستێت.

لێدوانی فەرمی: عومەر چێلیك، وتەبێژی ئاكپارتی، پارتەكەی سەرۆكۆماری توركیا ڕایگەیاند، پەكەكە تەنیا لە عێراق نا، بەڵكو لە سووریاش پێویستە چەك دابنێت و خۆی هەڵبوەشێنێتەوە.

ئەوەی پێویستە بیزانیت: پەیامەكەی وتەبێژی ئاكپارتی بەناڕاستەوخۆ ژمارەیەك پارتی سیاسیی و چەكداریی ڕۆژئاوای كوردستانیش دەگرێتەوە كە لەسەر هەمان پەیڕەو و پڕۆگرامی پەكەكەن، هەرچەندە بەشێك لە بەرپرسانی ئەو پارتانە دوای بڵاوبوونەوەی پەیامەكەی ئۆجەلان ڕایانگەیاند، "ئەو پەیامە بەهیچ جۆرێك پەیوەندی بە ئێمەوە نییە و ئاڕاستەی ئێمە نەكراوە"، هاوكات بابەتی چەكدانانیان بەستەوە بە وەستانی هێرشەكانی توركیا بۆ سەر ڕۆژئاوای كوردستان.