وەزارەتی نەوتی عێراق بۆ ئەپیكۆر: سەردانی بەغدا بکەن با ڕێکبکەوین

ئاڤا نیوز

 

وەزارەتی نەوتی عێراق بۆ گفتوگۆ و لێکتێگەیشتن سەبارەت بە کێڵگە نەوتییەکانی هەرێمی کوردستان داوا لە وەزارەتی سامانە سرووشتییەکان و کۆمپانیاکانی بواری نەوت دەکات، سەردانی بەغدا بکەن.

 

چیرۆكی سەرەكی: ئەو داواکارییەکەی وەزارەتی نەوتی عيراق، دوای ئەوە  هات ڕۆژی هەینی ڕابردوو 28-2-2025  وەزیری نەوتی عێراق ڕاگەیاند، لە چەند كاتژمێری داهاتوودا هەناردەكردنی نەوتی هەرێمی كوردستان دەستپێدەكاتەوە، لەبەرامبەردا كۆمەڵەی پیشەسازیی نەوتی كوردستان ( ئەپیكۆر) كە ئەركی دەرهێنانی نەوتی هەرێمی كوردستانی لە ئەستۆیە بێئاگایی خۆی ڕاگەیاند و گوتی، "دەبێت ڕێككەوتن بكرێت".

 

ڕاگەیێنراوی فەرمی: وەزارەتی نەوتی عێراق لەڕاگەیێنراوێکدا بەفەرمی داوای لە كۆمەڵەی پیشەسازیی نەوتی كوردستان ( ئەپیكۆر) و وەزارەتی سامانە سرووشتییەکانی هەرێمی کوردستان دەکات، ڕۆژی سیشەممەی داهاتوو 4-3-2025 سەردانی بەغدا بکەن.

 

زانیاری زیاتر: وەزارەتی نەوتی عێراق ئاماژە بەوەدەکات مەبەست لەو سەردانە گفتوگۆکردن و لێکتێگەیشتنە لەنێوان هەر سێ لایەنی پەیوەست بەهەناردەکردنەوەی نەوتی هەرێمی کوردستان لەداهاتوویەکی نزیکدا.  

 

ئەمەش بزانە: وەزارەتی نەوتی عێراق داوای دەستپێکردنەوەی هەناردەکردنی نەوتی بەرهەمهێنراوی كێڵگه‌ نه‌وتییه‌كانی هه‌رێمی كوردستان دەکات بۆ ئەوەی لەڕێگەی بەندەری جەیهانەوە ڕه‌وانه‌ی بازاره‌كان  بكرێت، بەپێی ئەو بڕەی لە یاسای بودجەدا جێگیر کراوە.