تاران پێشبینی بەردەوامی هاوردەکردنی غازی ئێرانی لەلایەن عێراقەوە دەکات

ئاڤا نیوز

بەڕێوەبەری جێبەجێکاری کۆمپانیای نیشتمانیی غازی ئێران پێیوایە عێراق مۆڵەتی کاتی بۆ بەردەوامی هاوردەکردنی غاز لە ئێرانەوە لەلایەن ئەمریکاوە وەردەگرێت بۆ پڕکردنەوەی پێداویستییەکانی.

 

وێنە گەورەکە: وادەی لێخۆشبوونی ئەمریکا بۆ هاوردەکردنی غازی ئێران لەلایەن عێراقەوە ڕۆژی 8ـی ئەم مانگە کۆتایی دێت و بەو هۆیەشەوە عێراق ڕووبەڕووی قەیرانی کەمیی کارەبا دەبێتەوە.

 

لێدوانی فەرمی: سەعید تەوەکولی، بەڕێوەبەری جێبەجێکاری کۆمپانیای نیشتمانیی غازی ئێران و جێگری وەزیری نەوتی ئێران ڕایگەیاند، عێراق مۆڵەتی کاتی بۆ هاوردەکردنی غاز لە ئێرانی وەردەگرێت.

 

بە گوێرەی هەواڵێکی ئاژانسی مهیری ئێران، تەوەکولی پێیوایە، عێراق هەمیشە مۆڵەتی کاتیی وەردەگرێت بۆ ئەوەی غاز لە ئێرانەوە هاوردە بکات بۆ ئەوەی بتوانێت ئەم غازە بۆ پێداویستییەکانی وڵاتەکەی دەستبکەوێت.

- پێشبینی ئەوە دەکەن ئەمە دووبارە دەبێتەوە و جارێکی دیکە مۆڵەت بە عێراق بدرێتەوە.

 

ئەوەی پێویستە بیزانیت: لە چوارچێوەی تووندکردنەوەی سزاکانی سەر ئێران، ئەو لێخۆشبوونەی به عێراق درابوو بۆ هاوردەکردنی کارەبا و غاز له ئێرانەوە، لەلایەن دۆناڵد ترەمپ، سەرۆکی ئەمریکا هەڵوەشێنرایەوە و وادەکە لە 8ی ئازار کۆتایی دێت.

 

لەلایەکی دیکەوە: ڕۆژی 27ی شوبات  فوئاد حوسێن، وەزیری دەرەوەی عێراق ڕایگەیاند: لە چوارچێوەی زیادکردنی گوشارەکانی ئەمریکا بۆسەر ئێران،  ئەمریکا پرسی ڕاگرتنی هاوردەکردنی گازی لە ئێرانەوە لەگەڵ بەغدا باسکردووە.