ئومێد خۆشناو: هەر بازرگانێک نرخ گران بکات و قۆرخکاری بکات ناوی بڵاو دەکەینەوە

کوردستان
1 ئازار

شەیری بکە لە:

ئومێد خۆشناو: هەر بازرگانێک نرخ گران بکات و قۆرخکاری بکات ناوی بڵاو دەکەینەوە

ئومێد خۆشناو، پارێزگاری هەولێر

ئاڤا نیوز

پارێزگاری هەولێر ڕایدەگەیەنێت، هەر بازرگان و لایەنێک هاتنی مانگی ڕەمەزان بقۆزێتەوە و بە ئەنقەست قۆرخکاری بکات و نرخ گران بکات، ناوی بڵاو دەکەینەوە.

وێنە گەورەکە: ئەمڕۆ یەکەم ڕۆژی مانگی ڕەمەزانی پیرۆزە، ساڵانە لەگەڵ هاتنی ئەم مانگە، خواست لەسەر زۆربەی کەلوپەلە خۆراکییەکان زیاد دەبێت، بەشێک لە بازرگانان و خاوەن کۆگاکان بەمەبەستی گرانکردنی نرخی کەلوپەل قۆرخکاری دەکەن.

لێدوانی فەرمی: لە کۆنگرەیەکی ڕۆژنامەوانیدا، ئومێد خۆشناو، پارێزگاری هەولێر ڕایگەیاند، لیژنەکانی بەدواداچوونی بازاڕ و تیمەکانی قایمقامیەت و ئاسایشی ئابووری و پۆلیس بەهیچ شێوەیەک ڕێگە نادەن قۆرخکاری بکرێت و بە ئەنقەست نرخی کەلوپەل و خۆراک گران بکرێت، تەنانەت ئەمساڵ ناوی ئەو بازرگان و کەسانەش بڵاودەکەینەوە کە سەرپێچی دەکەن.

زانیاریی زیاتر: لەبارەی گرانبوونی غاز کە چەند ڕۆژێکە نرخی هەر بوتڵێک گەیشتووەتە 14 هەزار، پارێزگاری هەولێر وتی: " گرانبوونی غاز پەیوەندیی بە هاتنی مانگی ڕەمەزانەوە نییە، بەڵکو بەشێوەیەکی گشتی لە وەرزی ساردی زستاندا خواست لەسەر غاز و سووتەمەنی زیاتر دەبێت بۆیە جۆرێک قۆرخکاری تێدا ڕوودەدات."

چی دەکرێت: ئومێد خۆشناو دڵنیایی دەدات لەوەی پڕۆسەی دەرهێنانی کۆبوونی سووتەمەنی بەشێوەی ئەلیکترۆنی، لە قۆناغی تەندەرینگە و بە تەواوبوونی وەک کارتی زیرەک لای هاووڵاتی دەبێت و مانگانە بەشە نەوت و غازی پێویست بە هەر خانەوادەیەک دەدرێت.