پەرلەمانتارێکی پێشووی دەم پارتی بۆ ئاڤا: لە ماوەی داهاتوودا زۆر شت دەگۆڕێت

ئاڤا نیوز

حەسەن ئۆزگونوش، پەرلەمانتاری پێشووی دەم پارتی و سیاسەتمەداری باکووری کوردستان بە ئاڤا میدیای ڕاگەیاند، با پێتان بڵێم لەم ماوەیەدا زۆر شت دەگۆڕێت و گۆرانکارییەکان خێرادەبن، لە بارەی تۆمارە ڤیدیۆییەکەی ئۆجەلان گوتی: "ئۆجەلان  ڤیدیۆیەکەی تۆمارکردووە، بەڵام ئایا ڤیدیۆکە بۆ قەندیل دەنێردرێت، یان لە نەورۆز بڵاو دەکرێتەوە" هێشتا یەکلایی نەبووەتەوە.

وێنە گەورەکە: عەبدوڵڵا ئۆجەلان، ڕێبەری زیندانیکراوی پەکەکە ڕۆژی 27ـی شووبات داوای "‌هەڵوەشاندنەوەی پەکەکەی کرد" و ئەمڕۆش پەکەکە قبووڵی کرد، بەڵام مەرجی هەیە و "دابین کردنی شوێنێکی وەک ماڵ بۆ ئۆجەلان بۆ ڕاپەراندنی کارە سیاسی و دیالۆگەکان" داواکارییەکی دیاری پەکەکە دەبێت.

لە لایەکی دیکەوە: سڕی سورەیا ئۆندەر، ئەندامی شاندی ئیمرالی لە بارەی پێشهاتەکانی دوای بانگەوازەکەی ئۆجەلان و قبووڵکردنی لەلایەن پەکەکەوە گوتی: لێرە بەدواوە زنجیرەیەک کۆبوونەوەی سیاسی لە نێوان لایەنە سیاسییەکان دەستپێدەکات، لە هەفتەی داهاتوودا زۆر شت ڕوون دەبێتەوە.

گوتیشی، ڕاگەیێنراوەکەی پەکەکە چاوەڕوانکراو بوو، لە هەفتەی داهاتوودا، زنجیرەیەک کۆبونەوە لە نێوان کاربەدەستانی دەوڵەت و لایەنە سیاسییەکان ئەنجام دەدرێت، هیوادارم لە ماوەی سێ مانگ هەموو شتێک ڕێکخرابێت.