گەندەڵییەکی نوێ لە عێراق وەکو بورکان لە میدیاکان دەتەقێتەوە

ئاڤا نیوز

 گەندەڵییەکی گەورە لە زانکۆکانی لوبنان ئاشکرا دەبێت، لە بەرامبەر پارەدا بڕوانامەی ماستەر و دکتۆرای ساختە بە 27 هەزار کەس دەبەخشن کە بەشی زۆری ئەوانەی بڕوانامەکانیان پێدراوە خەڵکی عێراقن.

وێنە گەورەکە: گەندەڵییەکی نوێ لە عێراق وەکو بورکان لە میدیاکان تەقیوەتەوە، ئەویش فرۆشتن و پێدانی 27 هەزار بڕوانامەی ماستەر و دکتۆرایە لەلایەن زانکۆکانی لوبنان بە بەرپرس و دەوڵەمەند و منداڵەکانیان، میدیاکان دەڵێن پێدانی بڕوانامەکان بە تەزویر و بەدەر لە هەموو یاسا و مەرجە زانستییەکان بووە.

ئەوەی پێویستە بیزانیت: ژمارەیەك ڕۆژنامەنووس و دەزگای میدیایی ناسراوی لوبنان، گەندەڵییەکەیان ئاشكرا کردووە، دەڵێن 28 زانكۆی ڕێپێدراوی لوبنان بەشێوەی نایاسایی و دوور لە ڕێكارە زانستی و ئوسوڵییەكان، بڕوانامەیان بە هەڵگرانی ڕەگەزنامەی عێراقی داوە لەبەرامبەر پێدانی بڕێك پارە، واتا بروانامەیان پێ فرۆشتوون، لەنێو سەرجەم زانكۆكانیش، سێ زانكۆ بەشێوەیەكی قووڵتر لەو دۆسیەیە تێوەگلاون.

ئەمەش بزانە: میدیاکانی لوبنان دەڵێن،

- فرۆشتنی بڕوانامە لەو وڵاتە بووەتە بازرگانییەكی باو کە لە بەرامبەر پێدانی هەر بڕوانامەیەكی ماستەر بڕی پێنج هەزار دۆلار وەردەگیرێت.

- بڕوانامەی دكتۆرا بە دەفتەرێک دۆلار بە چەند نووسینگەیەك دراوە كە كاری دەڵاڵییان كردووە لەنێوان قوتابیە عێراقییەكان و زانكۆكان، تەنانەت لە لوبنان چەند نووسینگەیەك كراونەتەوە، كاریان دەرهێنانی بڕوانامە و بەڵگەنامەی گەشت و تكتی فڕۆكە و ماوەی مانەوە بووە بەشێوەی ساختە، وەك بەشێك لە داواكارییەکان بۆ تەعدیلكردنی بڕوانامە لەلایەن وەزارەتی خوێندنی باڵای عێراق.

لەلایەکی دیکەوە: وەزارەتی خوێندنی باڵای عێراق لیژنەیەكی باڵای پێكهێناوە بۆ ئەوەی مەیدانی لێکۆڵینەوە و بەدواداچوون بکەن، لە ئەگەری ئیسپاتبوونی گەندەڵییەکە و ساغبوونەوەی ڕاستییەكان، ڕێککاری پێویست و یاسایی دەگرنەبەر.