بۆ یەکەمجار و دوای 14 ساڵ کەشتییەکی جەنگیی فەرەنسا دەگاتە بەسرە

ئاڤا نیوز

 

لەسەر داوای حکومەتی عێراق و بەمەبەستی ڕاهێنان و ڕاوێژ بە هێزی دەریایی وڵاتەکەی، دوای 14 ساڵ کەشتییەکی سەربازیی فەرەنسا گەیشتە بەسرە.

 

چیرۆکی سەرەکی: حکومەتی عێراق دەیەوێت هاوکات لەگەڵ بەندەری گەورەی فاو، بنکەیەکی دەریایی پێشکەوتووش لەسەر کەنداوی عەرەبی بونیاد بنێت، بۆ ئەو مەبەستەش لە ساڵی 2019ەوە کارکردنی لە بنکەکەدا دەستپێکردووە بەبێ ئەوەی زانیاری لەبارەیەوە بخاتەڕوو.

 

لێدوانی فەرمی: ئیریک کومیز، بەڕێوەبەری بەشی کاروباری سەربازیی لە باڵیۆزخانەی فەرەنسا لە عێراق ڕایگەیاند: کەشتی فەڕەنسی 'لاسین' ڕۆژی 1ی ئازار گەیشتووەتە بنکەی دەریایی ئوم قەسر، ئەوەش یەکەم کەشتی فەڕەنسییە کە لە ساڵی 2011ەوە دێتە عێراق.

 

زانیاریی زیاتر: "ئامانجمان بەردەوامیدانە بە گفتوگۆ لەگەڵ عێراق، کە داوای پشتیووانی فەڕەنسای کردووە بۆ ڕاهێنان و ڕێکخستنی کاروباری بنکە دەریاییەکەی لە فاو، فەڕەنسا هەماهەنگیی دەریایی لەگەڵ عێراق زیاد دەکات، چونکە وەک هاوبەشێکی باوەڕپێکراو سەیری دەکات". ئیریک کومیز وادەڵێت.