سوودانی بڕیار لەسەر جێبەجێکردنی یاسای گەڕاندنەوەی زەوی بۆ جووتیارانی کورد دەدات

ئاڤا نیوز

محەممەد شیاع سوودانی سەرۆکوەزیرانی عێراق ئەمینداریەتیی گشتیی ئەنجوومەنی وەزیرانی ڕاسپارد بە دەرچوواندنی ڕێنمایی تایبەت بە جێبەجێکردنی یاسایی گەراندنەوەی زەوییەکان بۆ خاوەنەکانیان.

وێنە گەورەکە: نیو سەدەیە پشت ئەستوور بە بڕیاری مەجلس قیادە سەورەی ڕژێمی بەعس کە ئێستا لە پەرلەمان هەڵوەشاوەتەوە، لە وەرزی داچاندن و دروێنەدا سوپای عێراق و عەرەبی هاوردە ناهێڵن جووتیارانی کورد زەوییە ڕەسەنەکانیان بەکاربهێنن، ماوەیەک پێش ئێستا لە سنووری شەناغە ڕێگری لە جووتیاران کرا، ئەمەش بەبیانووی ئەوەی هێشتا فەرمانی هەڵوەشاندنەوەی یاسای گەڕانەوەی زەوی بۆ خاوەنەکانیانیان بەدەست نەگەیشتووە.

زانیاریی زیاتر: ڕۆژی  17ـی  شوبات داوایەک ئاراستەی سەرۆکوەزیرانی عێراق کرا  لەسەر کێشەکانی جووتیاران و جێبەجێ کردنی یاسایی پوچەڵکردنەوەی بریارەکانی ڕژێمی بەعس، ئەویش لیژنەیەکی ناردە کەرکووک و لە نزیکەوە گوێیان لە داواکارییەکانی جووتیاران گرت و پێشنیازەکانیان بردەوە لای سوودانی.

لێدوانی فەرمی: د. شاخەوان عەبدوڵڵا، جێگری سەرۆکی پەرلەمانی عێراق دەڵێت، "جیا لە پەسەندکردنی پێشنیازەکان، سوودانی ئەمینداریەتیی ئەنجوومەنی وەزیرانیشی ڕاسپاردوە بۆ دەرچوواندنی ڕێنمایی تایبەت بە جێبەجێکردنی یاسای گەڕاندنەوەی زەوییەکان بۆ خاوەنەکانیان."