مانگی ڕابردوو 21 هاووڵاتیی كورد لە ئێران لەسێدارەدراون

ئاڤا نیوز

 

مانگی ڕابردوو، سزای لەسێدارەدان لەدژی 88 بەندكراوی نێو گرتووخانەكانی ئێران جێبەجێ كراوە كە زۆربەیان بە تۆمەتی بازرگانیكردن و بەكارهێنانی ماددەی هۆشبەر بووە.

 

وێنە گەورەكە: بەپشتبەستن بە داتا و ئاماری تۆماركراوی ناوەندی بەڵگەنامەكانی ڕێكخراوی مافی مرۆڤی هەنگاو كە بایەخ بە ڕەوشی مافەكانی مرۆڤ لە وڵاتی ئێران دەدات، بەدرێژایی مانگی شوبات، سزای لەسێدارەدانی 88 بەندكراو لە گرتووخانەكانی ئێران جێبەجێ كراون كە 21 لەو سزادراوانەش، كوردن.

 

ڕاگەیێنراوی فەرمی: ڕێكخراوی مافی مرۆڤی هه‌نگاو رایگه‌یاند، سەرچاوە فەرمییەكانی ئێران و ماڵپەڕە پەیوەندیدارەكانی دەزگای دادوەریی ئێران، زانیاریی لەبارەی تەنها شەش حاڵەتی لەسێدارەدان بڵاوكردووەتەوە، هاوكات سزای لەسێدارەدانی چوار بەندكراو بەشێوەی نهێنی و بێ ئاگاداری خانەوادە و ئەنجامدانی كۆتا چاوپێكەوتن لەگەڵ كەسوكارەكەیان، جێبەجێكراوە. بەڵام دوای بەدواداچوونی ورد، دەركەوتووە لانیكەم 88 كەس لەسێدارە دراون.

 

زانیاریی زیاتر: سێ لەو كەسانەی لەسێدارە دراون، ئافرەتن و لە بەندیخانەكانی خوڕەمئاوا، ساری و شیراز، سزاكەیان جێبەجێكراوە و هەر سێكیشیان تۆمەتی كوشتنیان بەسەردا ساغبووەتەوە.

 

ژمارەكان وادەڵێن: 41 لەو كەسانەی لەسێدارە دراون، تۆمەتی بازرگانیكردن بە ماددەی هۆشبەریان بەسەردا ساغبووەتەوە، 39 تۆمەتبار بە تاوانی كوشتن، 5 تۆمەتبار بە تاوانی دەستدرێژی سێكسی و 3 سزادراویش بە تۆمەتی دزیكردن بە بەكارهێنانی توندوتیژی، لەسێدارە دراون.