زانیاریی ئاڤا: كۆنترین ئێسكەپەیكەری مرۆڤ لە سلێمانی دەدۆزرێتەوە

ئاڤا نیوز

 

کۆنترین ئێسکەپەیکەری مرۆڤ لە سلێمانی دەدۆزرێتەوە کە مێژووەکەی دەگەڕێتەوە بۆ پێنج هەزار ساڵ لەمەوبەر.

 

چیرۆکی سەرەکی: لەکاتی کارکردن لە پرۆژەی ئەندەرپاسی تۆفیق وەهبی کە لەناوجەرگەی شاری سلێمانی کارەکانی دەکرێت، هەست بە هەبوونی شتێکی مێژوویی کراوە، دوای ئاگادارکردنەوەی بەڕێوەبەرایەتی شوێنەواریی سلێمانی، تیمەمانی هەڵکۆڵین و پشکنینی سەر بە بەڕێوەبەرایەتیی شوێنەوار کاری کنە و پشکنینیان دەستپێکردووە و ئێسکە پەیکەری مرۆڤێک دەدۆزنەوە.

 

زانیاریی بەدەستهاتوو: ئاڤا وەک یەکەم دەزگای میدیایی ئەم دۆزینەوە مێژووییە ئاشکرا دەکات، پەیامنێرمان ژیوار عەبدولرەحمان چووەتە بەڕێوەبەرایەتیی شوێنەواری سلێمانی و خۆی ئێسکە پەیکەرەکەی بینیوە، کە هی مرۆڤێکی ڕەگەزی نێرە و مێژووەکەی دەگەڕێتەوە بۆ پێنج هەزار ساڵ.

 

زانیاریی تایبەت: ئێستا شوێنەوارناسان لێکۆڵینەوەکانیان لەسەر ئەو دۆزینەوەیە دەستپێکردووە، شوێنەوارناسان ئاشکرای دەکەن ئەو ئێسکەپەیکەرە کۆنترین ئێسکەپەیکەری مرۆڤە کە لە پارێزگای سلێمانی دۆزرابێتەوە.

 

زانیاریی زیاتر: یەکێک لە ئەندازیارانی پڕۆژەی ئەندەرپاسی تۆفیق وەهبی بە ئاڤای ڕاگەیاندووە، بەهۆی ئەو دۆزینەوە مێژووییە، ماوەی دوو هەفتە کارەکانی پڕۆژەی دروستکردنی ئەندەرپاسەکەیان وەستاندووە تاوەکو تیمەکانی شوێنەوار پرۆسەی هەڵکۆڵین و پشکنینیان تەواوکردووە. 

 

بۆچی گرنگە: پێشتریش چەندین ئێسکە پەیکەری مرۆڤ لە ناوچەکانی سلێمانی دۆزراوەتەوە، ئەوەش دەرخەری ئەوەیە لەپێش زایین ژیان و شارستانیەت لەم ناوچەیە هەبووە.