سەرۆک بارزانی: ڕاپەرین پەیامێکی ڕوون بوو کە گەلی كوردستان زیندووە و ئازادی دەوێت

ئاڤا نیوز

 

سەرۆک بارزانی لە یادی ڕۆژی ڕاپەرینی خەڵکی کوردستان دەڵێت، "ڕاپەڕین لە دژی دامودەزگەی ستەمکار و داگیرکەر، پەیامێکی ڕوون بوو کە سەرباری بوونی زوڵم و سەرکوتکاری و تۆقاندن، گەلی كوردستان زیندووە و ئازادی و سەربەستی دەوێت".

 

وێنە گەورەکە: ڕۆژی 1991-03-05، یەکەم چەخماخەی ڕاپەڕین لە ڕانیە لێدرا و هاووڵاتییان بە پشتیوانیی هێزەکانی پێشمەرگە، دژی زوڵم و ستەمی دەسەڵاتی ڕژێمی بەعس ڕاپەڕین، دواتر ناوچەکانی دیکەی هەرێمی کوردستانی گرتەوە، ڕاپەڕینی ساڵی 1991 بە یەکێک لە ڕووداوە مێژووییەکانی گەلی کورد لە هەر چوار پارچەی کوردستان دادەنرێت.

 

پەیامی فەرمی: سەرۆک بارزانی لە پەیامەکەیدا بەبۆنەی ڕاپەرین ڕایگەیاند، "بە بۆنەی سی و چوارەمین ساڵیادی ڕاپەڕینە مەزنەكەی گەلی كوردستان پیرۆزبایی لە خانەوادەی سەربەرزی شەهیدان و پێشمەرگە قارەمانەكان و هەموو خەباتگێڕ و ئازادیخواز و نیشتیمانپەروەران و سەرجەم خەڵكی كوردستان دەكەم".

 

زانیاریی زیاتر: لە پەیامەکەی سەرۆک بارزانیدا هاتووە، "ڕاپەڕین یەکێکە لە سەروەری و دەستکەوتە گرانبەهاکانی گەلی کوردستان. لە سایەی ئیرادەی ئازادیخوازیی گەلی كوردستان و، قارەمانێتی پێشمەرگە و یەكڕیزیی لایەنەكانی ناو بزووتنەوەی ڕزگاریخوازی كوردستاندا ڕاپەڕین هاتەدی و سەركەوتنی بەدەست هێنا. ڕاپەڕین لە دژی دامودەزگەی ستەمکار و داگیرکەر، پەیامێکی ڕوون بوو کە سەرباری بوونی زوڵم و سەرکوتکاری و تۆقاندن، گەلی كوردستان زیندووە و ئازادی و سەربەستی دەوێت. ڕاپەڕین ئەو ڕاستییەی سەلماند كە داگیركاری و ستەم چەندە بەهێزیش بن، سەرئەنجام هەر كۆتایی دێت و ئەوە ئیرادە و هێزی گەلی كوردستانە كە براوە دەبێت".

 

ئەوەی پێویستە بیزانیت: سەرۆک بارزانی، لەم یادە "پیرۆزەدا جەخت لە بەها پیرۆزەكانی ڕاپەڕین و پەیامی ئاشتی و برایەتی و پێكەوەژیانی گەلی كوردستان دەكەینەوە. سڵاو بۆ ڕۆحی بەرزی شەهیدانی ڕاپەڕین و هەموو شەهیدانی خەباتی ڕزگاریخوازی كوردستان دەنێرین، کە بە خوێنی پاكیان ئازادی و سەربەستیان بۆ گەلەكەمان هێنایە دی".