زیاتر لە 300 هەزار پەنابەر لە عێراق دەژین و 85%ـیان لە هەرێمی کوردستانن

ئاڤا نیوز

کۆمیسیۆنی باڵای نەتەوە یەکگرتووەکان بۆ کاروباری پەنابەران دەڵێت، زیاتر لە 300 هەزار پەنابەری وڵاتانی دیکە لە عێراق دەژین کە 90%ـیان خەڵکی سووریان، لەو ژمارەیەش 85%ـیان هەرێمی کوردستانیان بۆ شوێنی ژیانیان هەڵبژاردووە.

چیرۆکی سەرەکی: لە پاڵ پەنابەران، نزیکەی ملیۆنێک عێراقیش لە شوێنی خۆیان ئاوارە بوون کە زۆرینەیان لە دەرەوەی کەمپەکان دەژین، 109 هەزار ئاوارەی شارەکانی دیکەی عێراقیش لە 21 کەمپی هەرێمی کوردستان دەژین.

ڕاگەیێنراوی فەرمی: کۆمیسیۆنی باڵای نەتەوە یەکگرتووەکان بۆ کاروباری پەنابەران لە کۆتا ڕاپۆرتی خۆیدا کە بۆ ساڵی 2024 بڵاویکردووەتەوە ئاماژەی بەوەکردووە، 338 هەزار و 138 پەنابەر لە عێراق دەژین و بەم جۆرە دابەش بوون:

٠ 303 هەزار و 611 پەنابەریان سوورین

٠ نۆ هەزار و 582 پەنابەری دیکە

٠ نۆ هەزار و 447 پەنابەری ئێرانین

٠ هەشت هەزار و 213 پەنابەری تورکیا

حەوت هەزار و 285 پەنابەری فەڵەستینین

ژمارەکان وا دەڵێن:  85%ـی پەنابەران لە هەرێمی کوردستانن و 15% دیکەی تریش لە پارێزگاکانی دیکەی عێراق دەژین، لەناو ئەو پەنابەرانەی لە هەرێمی کوردستان دەژین، 73%ـیان لە ناوچەکانی دانیشتووان و شارەکان دەژین، 27%ـیشیان لەناو نۆ کەمپدان، کە چوار کەمپیان لە هەولێر و چواریان لە دهۆک و یەک کەمپیش لە سلێمانییە.

ئەمەش بزانە: بودجەی تەرخانکراو بۆ هاوکاریکردنی پەنابەران 92% کورتهێنانی هەیە، ئەوەش گرفت بۆ دابینکردنی خزمەتگوزارییەکانی وەک پەروەردە و تەندروستی و هاوکاری کۆمەڵایەتی دروستدەکات.