سەرۆکی ئەنجوومەنی پارێزگای نەینەوا لە پۆستەکەی دوورخرایەوە

 

ئاڤا نیوز

ئەنجوومەنی پارێزگای نەینەوا بە زۆرینەی دەنگ سەرۆکی ئەنجوومەنەکەی لە پۆستەکەی دوورخستەوە.

چیرۆکی سەرەکی: ئەمڕۆ چوارشەممە، ئەندامانی ئەنجوومەنی پارێزگای نەینەوا لە دانیشتنێکدا، لێپرسینەوەیان لەگەڵ ئەحمەد حاسوود، سەرۆکی ئەنجوومەنەکە کرد و بڕیاریان دا لە پۆستەکەی دووریبخەنەوە.

هۆکارە زانراوەکان: سەرۆکی ئەنجوومەن چەندین تۆمەتی سەرپێچیکردنی یاسایی لەلایەن هاوپەیمانی "نەینەوا موەحەدە" ئاراستە کرابوو، بەهۆی ئەمەشەوە بە زۆرینەی دەنگی ئەندامانی ئەنجوومەنەکە لە پۆستەکەی لادرا.

قووڵتر: بەگوێرەی چەندین بەڵگەنامە "ئەحمەد حاسوود" ڕووبەڕووی چەندین دۆسیەی گەندەڵی بووبوو، لەوانەش؛ بەکارهێنانی ناونیشانی زانستیی ساختە، چونکە بڕوانامەکەی لە عێراق باوەڕپێکراو نییە، هاوکات بەگوێرەی نووسراوێکی زانکۆی موسڵ، ئەحمەد حاسوود چوار جار هەوڵی داوە بڕوانامەکەی هاوتا بکات، بەڵام سەرکەوتوو نەبووە.

بە تەنیشت ئەم بابەتەوە: پۆستی سەرۆکی ئەنجوومەنی پارێزگا لە عێراق پلەی بریکاری وەزیری هەیە و بۆ وەرگرتنی ئەو پۆستە دەبێت بڕوانامەی بەکالۆریۆسی باوەڕپێکراوی لە عێراق دا هەبێت.

زانیاریی زیاتر: حاسوود دەرچووی ئامادەییە لە بەشی ئەدەبی، سەرەڕای ئەوەش بڕوانامەی بەکالۆریۆسی لە پزیشکیی ددان لە وڵاتی ئۆکراینا بەدەست هێناوە.

لێدوانی فەرمی: ئەحمەد نازم دووبەردانی، ئەندامی ئەنجوومەنی پارێزگای نەینەوا بە ئاڤا میدیای ڕاگەیاند: ئەنجوومەنی پارێزگا محەممەد جبووری، جێگری سەرۆکی ئەنجوومەنی ڕاسپارد بە سەرۆکایەتیکردنی ئەنجوومەنەکە تاوەکو سەرۆکێکی نوێ هەڵبژێردرێت.

وتیشی: لەئێستادا هاوکێشەیەکی نوێی سیاسی لە ئەنجوومەنی پارێزگاکە هەیە، هاوپەیمانیی "نەینەوا موەحەدە" لە بەرفراوانبوون دایە، هەڵبژاردنی سەرۆکێکی نوێ پێویستی بە سازان و ڕێککەوتنی نوێ هەیە.