حاسوود: دوورخستنەوەم لە سەرۆکایەتیی ئەنجوومەنی پارێزگای نەینەوا نایاساییە

 

ئاڤا نیوز

ئەمڕۆ چوارشەممە، ئەئجوومەنی پارێزگای نەینەوا بە تۆمەتی گەندەڵیکردن ئەحمەد حاسوود، سەرۆکی ئەنجوومەنەکەیان لە پۆستەکەی دوورخستەوە، حاسوودیش بڕیارەکەی ڕەتکردەوە و بە نایاسایی ناوی برد.

چیرۆکی سەرەکی: ئەمڕۆ چوارشەممە، ئەندامانی ئەنجوومەنی پارێزگای نەینەوا لە دانیشتنێکدا، لێپرسینەوەیان لەگەڵ ئەحمەد حاسوود، سەرۆکی ئەنجوومەنەکە کرد و بە دەنگی 16 ئەندام لە کۆی 29 ئەندامی ئەنجوومەنەکە بڕیاریان دا لە پۆستەکەی دووریبخەنەوە.

ڕاگەیێنراوی فەرمی: ئەحمەد حاسوود، سەرۆکی دوورخراوەی ئەنجوومەنی پارێزگای نەینەوا لە ڕاگەیێنراوێکدا ڕایگەیاند: ئەو ڕێکارانەی لە دانیشتنەکەدا گیراونەتەبەر نایاسایی بوون و پێچەوانەی پەیڕەوی ناوخۆی ئەنجوومەنە، بەوپێیەش هەر بڕیارێک لەو دانیشتنە درابێت ڕەوا نییە.

لەلایەکی دیکەوە: هاوپەیمانیی "نەینەوا موستەقبەل" کە لە هێزەکانی هاوپەیمانیی چوارچێوەی هەماهەنگی و هاوپەیمانەکانی پێکهاتوون، بڕیاری دوورخستنەوەی حاسوودی ڕەتکردەوە و ڕایگەیاند، پەنا دەبەنە بەر دادگا.

ئەوەی پێویستە بیزانیت: بەگوێرەی چەندین بەڵگەنامە "ئەحمەد حاسوود" ڕووبەڕووی چەندین دۆسیەی گەندەڵی بووەتەوە، لەوانەش؛ بەکارهێنانی ناونیشانی زانستیی ساختە، چونکە بڕوانامەکەی لە عێراق باوەرپێکراو نییە.