یەدەگی زێڕی عێراق لە مانگێكدا 10 تۆن زیادی كردووە

ئاڤا نیوز

بەپێی نوێترین ئاماری ئەنجوومەنی زێڕی جیهانی، یەدەگی زێڕی عێراق لە مانگێكدا 10 تۆن زیادی كردووە، هاوكات پارێزگاری بانكی ناوەندیی عێراقیش دەڵێت، یەدەگی زێڕ گەیشتووەتە 162 تۆن.

وێنە گەورەكە: ئەمڕۆ چوارشەممە 5-3-2025، ئەنجوومەنی زێڕی جیهانی، نوێترین ئامار و داتاكانی یەدەگی زێڕی لە سەرانسەری جیهان بڵاوكردەوە و بەپێی ئامارەكەش یەدەگی زێڕی عێراق 162 تۆنی تێپەڕاندووە و بەهۆیەوە لەنێو وڵاتانی عەرەبیدا گەیشتووەتە پلەی چوارەم.

لێدوانی فەرمی: عەلی عەلاق، پارێزگاری بانكی ناوەندی عێراق لە لێدوانێكی ڕۆژنامەوانیدا بۆ دەزگاكانی ڕاگەیاندن ئاشكرای كرد،

- عێراق لەڕووی زیادكردنی یەدەگی زێڕەوە هەنگاوێكی گەورەی هاویشتووە و ڕێژەی گەشەسەندنی ئابوورییەكەی 45%ـە و ئێستا لە پلەی چوارەمی وڵاتانی عەرەبی و 28ـەمینی وڵاتانی جیهاندایە.

- لە چارەگی یەكەمی ئەمساڵ بەهای زێڕی یەدەگی عێراق لە 12.29 تریلیۆن دینارەوە گەیشتووەتە 17.83 تریلیۆن، ئەمەش گەشەسەندنێكی جۆرییە لە بووژانەوەی ئابووریی عێراق.