بڕیارێکی ئەمریکا "ئاستەنگ" بۆ گەڕانەوەی عێراقییەکانی کەمپی هۆل دروست دەکات

ئاڤا نیوز

ڕاوێژکاری ئاسایشی نیشتیمانی عێراق ڕایگەیاند، بڕیارەکەی ئەمریکا بۆ کەمکردنەوەی هاوکارییە نیودەوڵەتییەکان، ئاستەنگیی و ڕێگریی بۆ گەڕانەوەی ئەو عێراقییانە دروستدەکات کە بەغدا دەیەوێت تا کۆتایی ئەمساڵ سەرجەمیان بگەڕێنێتەوە.

چیرۆکی سەرەکی: هەفتەی ڕابردوو ئیدارەی ئەمریکا بڕیاریدا 92%ـی هاوکارییە دەرەکییەکان و پارەدارکردنی پڕۆژە نێودەوڵەتییەکانی گەشەپێدان کەمبکاتەوە، بەوهۆیەشەوە بەرنامەی هاوکاری کەمپەکانی سووریا ڕووبەڕووی ئاستەنگ دەبێتەوە بەهۆی ئەوەی بەڕێوەبردنی کەمپەکان پشتی بە هاوکاری نێودەوڵەتی بەستووە.

لێدوانی فەرمی: قاسم ئەعرەجی، ڕاوێژکاری ئاسایشی نیشتیمانی عێراق بۆ ئاژانسی فرانس پرێس ڕایگەیاند:

٠ ڕاگرتنی هاوکاری ڕێکخراوەکان لەلایەن ئەمریکاوە تووشی سەرسوڕمانی کردین و ئەوەش کێشە بۆ ڕێكخراوەکان دروستدەکات.

٠ تاکە ئاستەنگی بەردەممان ڕاگرتنی هاوکارییەکانە، چونکە عێراق بە تەنیا ناتوانێت کۆتایی بەو دۆسیەیە بهێنێت، بۆیە داوا دەکەین کۆمەڵگەی نێودەوڵەتی لەم بابەتەدا هاوکار بێت.