گوتەبێژی حکومەت: هەڵمەتێکی میدیایی مەبەستدار دژی پرۆژەی ڕووناکی دەستپێکردووە

ئاڤا نیوز

 

گوتەبێژی حکومەت باس لەوە دەکات کە هەڵمەتێکی میدیایی مەبەستدار دژی پرۆژەی ڕووناکی دەستپێکردووە و دەیانەوێت لە گرنگی پڕۆژەکە بدەن، دەشڵێت حکومەتی هەرێمی کوردستان بۆ دابەشکردنی غازی ماڵان گرێبەستی لەگەڵ هیچ کۆمپانیایەک نەکردووە. 

ڕاگەیێنراوی فەرمی: پێشەوا هەورامانی، وتەبێژی حکومەتی هەرێمی کوردستان ڕایگەیاند، لە چەند کەناڵێک وا بڵاوکراوەتەوە کە حکومەت گرێبەستی لەگەڵ کۆمپانیایەک کردووە بۆ دابەشکردنی غازی ماڵان بەسەر هاووڵاتییان، ئەو هەواڵانە دوورن لە ڕاستییەوە. 

 

-    حکومەتی هەرێمی کوردستان گرێبەستی لەگەڵ هیچ کۆمپانیایەک نییە. 
-    دابەشکردنی غازی ماڵان بە هەمان سیستمی ئێستا دەبێت. 
-    دابەشكردنی غاز بە نرخی پاڵپشتیکراوی حکومەت دەبێت. 

 

لەلایەکی دیکەوە: لە بەشێکی دیکەی ڕاگەیێنراوەکەی وتەبێژی حکومەتدا هاتووە، ماوەیەکە هەڵمەتێکی میدیای مەبەستدار دژی پڕۆژەی ڕووناکی دەستیپێکردووە و دەیانەوێت لە گرنگی پڕۆژەکە بدەن. 

-    بە ڕەچاوکردنی بەرژەوەندی هاووڵاتیان حکومەت پلانی خۆی لە هەموو کوردستان جێبەجێ دەکات. 
-    بۆیەکەمجار و دوای چەندین ساڵ حکومڕانی هاونیشتمانیان دەبنە خاوەنی کارەبای 24 کاتژمێری. 
-    ژمارەی هاوبەشانی پڕۆژەی ڕووناکی گەیشتووەتە 86 هەزار خێزان. 
-    لە داهاتوودا هەموو هاونیشتمانیان سوودمەند دەبن لە کارەبای ڕووناکی. 
-    لەمەودوا داوای یاسایی لەسەر ئەو کەناڵانە تۆمار دەکەین کە هەواڵی ناڕاست بڵاودەکەنەوە.