عێراق لە دۆخی سووریا نیگەرانە و هۆشداری دەدات

ئاڤا نیوز

وەزارەتی دەرەوەی عێراق نیگەرانی قووڵی خۆی لە پێشهاتە ئەمنییە بەردەوامەکانی سووریا دەردەبڕێت و هاوکات دووپات لە هەڵوێستی پتەوی خۆی دەکاتەوە و داوای پێویستی پاراستنی هاووڵاتیانی مەدەنی دەکات.

 

وێنە گەورەکە: ماوەی سێ ڕۆژە شەڕ و پێکدادانەکان لە نێوان سوپای سووریای نوێ و پاشماوەی چەکدارانی سەر بە بەشار ئەسەد لە لازقییە بەردەوامە و تاوەکو ئێستا بەهۆیەوە بە زیاتر لە 80 کەس کوژراون.

 

ڕاگەیێنراوی فەرمی: بەگوێرەی ڕاگەیێنراوی وەزارەتی دەرەوەی عێراق، وەزارەتی دەرەوە بە نیگەرانییەکی زۆرەوە بەدواداچوون بۆ پێشهاتە ئەمنییە بەردەوامەکانی سووریا و کاردانەوەی جددییان لەسەر ئاسایش و سەقامگیری ناوچەکە دەکات.

 

- هەڵوێستی عێراق جێگیرە کە داوای پێویستی پاراستنی هاووڵاتیانی مەدەنی و ڕزگارکردنیان لە بەڵای ململانێکان دەکات.

- داوا دەکەین هەموو لایەک دان بەخۆیاندا بگرن و کاری لەپێشینەیان زمانی گفتوگۆ و پەسەندکردنی چارەسەری ئاشتییانە بێت لەبری پەرەسەندنی سەربازی.

- بە هەموو شێوەیەک بەئامانجگرتنی هاووڵاتیانی مەدەنی بێتاوان ڕەتدەکەینەوە.

- هۆشداری لە بەردەوامی تووندوتیژی دەدەین کە دەبێتە هۆی گەورەترکردنی قەیرانەکە و قووڵکردنەوەی دۆخی ناسەقامگیری ناوچەکە، ئەمەش دەبێتە ڕێگر لەبەردەم هەوڵەکان بۆ گەڕاندنەوەی ئاسایش و ئارامی.