پڕۆژەی ڕووناکی چوار گەڕەکی دیکەی هەولێر ڕووناک دەکاتەوە

ئاڤا نیوز

 

پڕۆژەی ڕووناکیی کارەبای 24 کاتژمێری، لە چوار گەڕەکی دیکەی هەولێر جێبەجێ دەکرێت.

 

وێنە گەورەکە: لە درێژەی هەوڵە بەردەوامەکانی حکومەتی هەرێمی کوردستان بۆ دابینکردنی کارەبای 24 کاتژمێری، پڕۆژەی ڕووناکی بۆ دابینکردنی کارەبای نیشتمانیی 24 کاتژمێری دەگاتە چوار گەڕەکی دیکەی هەولێر بەمەش کۆی گەڕەکە سوودمەندبووەکانی شارەکە دەگاتە 21 گەڕەک.

 

ڕاگەیێنراوی فەرمی: بەڕێوەبەرایەتیی گشتیی کارەبای هەولێر لە ڕاگەیێنراوێکدا ئاماژەی بەوەکردووە، پڕۆژەی ڕووناکی لە گەڕەکەکانی (زانیاری، تەعجیل، عارەبان، منارە) جێبەجێ دەکرێت کە دوازدە هەزار و 545 هاوبەشی کارەبا لەخۆدەگرێت.

 

ئەوەی پێویستە بیزانیت:  کارەبای هەولێر داوا لە هاووڵاتیان دەکات لەکاتی هەبوونی هەر پرسیارێک یاخود کێشەیەک، دەتوانن پەیوەندی بکەن بە سەنتەری خزمەتگوزاریی پڕۆژەی ڕووناکی لەڕێگای ژمارە 1992، و سەنتەرەکە لەکاتژمێر 9ـی بەیانی تاوەکو 9ـی شەو بەردەستە.