یەشار گولەر: ئاگربەست لەگەڵ پەکەکە ناکەین

ئاڤا نیوز

 

یەشار گولەر، وەزیری بەرگریی تورکیا ڕەتدەیکاتەوە ئاگربەست لەگەڵ پەکەکە بکەن و دەڵێت: پێویستە بە زووترین کات پەکەکە و درێژکراوەکانی بە بێ مەرج خۆیان هەڵوەشێننەوە و دەستبەجێ چەکەکانیان ڕادەست بکەن.

 

وێنە گەورەکە: تورکیا ڕژدە لەسەر ئەوەی پەکەکە و سەرجەم گرووپەکانی دیکەی سەر بەو ڕێکخراوە، بەبێ مەرج خۆیان هەڵبوەشێننەوە و چەکەکانیان ڕادەستی حکومەتی تورکیا بکەنەوە، پەکەکەش بۆ بەستنی کۆنگرەو خۆهەڵوەشاندنەوەی مەرجی ئەوەی هەیە کە" ئۆجەلان سەرپەرشتی کۆنگرەکە بکات و ئازادانە چالاکییەکانی ئەنجام بدات".

 

لێدوانی فەرمی: گولەر لە مەراسیمێکی دەرچووانی خوولی سەربازیی تورکیا لە بەڵکێسیر گوتارێکی دا و گوتی: پەکەکە و سەرجەم درێژکراوەکانی لە ژێر ناوی جیاواز، لە جوگرافیای جیاواز چالاکی دەکەن، پێویستە بەزووترین کات و بەبێ مەرج خۆیان هەڵبوەشێننەوە و دەستبەجێ چەکەکانیان ڕادەست بکەنەوە. ئەو گوتیشی، "هەرگیز شتێک نییە بەناوی ئاگربەست". 

 

ئەوەی لە بارەیەوە دەگوترێت: وشەی "ئاگربەست" لە ڕاگەیێنراوەکەی پەکەکە پرسیار و تێڕامانی لای دەسەڵاتدارانی تورکیا دروست کردووە بە "دروستکردنی سەرلێشێواندن" ناوی دەبەن کە ئامانج لێی درێژکردنەوەی پرۆسەکە بێت، دەڵێن: لە دەقی پەیامەکەی ئۆجەلاندا داوای ئاگربەست نەکراوە تاوەکو پەکەکە باسی ئاگربەست بکات. حکومەتی تورکیاش بە ئاگربەست ڕازی نییە.