کاتی چەکدانانی گرووپە چەکدارەکانی عێراق دیاری دەکرێت

ئاڤا نیوز

 

ڕاوێژکارێکی سەرۆکوەزیرانی عێراق ئاشکرای دەکات، هێزە چەکدارەکانی بەرەی مقاوەمەی عێراق کاتی ڕادەستکردنی چەکەکانیان و هەڵوەشاندنەوەی خۆیان بۆ حکومەت دیاریکردووە.

 

وێنەگەورەکە: بەگوێرەی زانیاریی میدیاکانی عێراق، زیاتر لە 10 هەزار چەکدار لە دەرەوەی دەسەڵاتی فەرماندەی هێزە چەکدارەکانی عێراق کار دەکەن و پێداگرن لەسەر مانەوە لە دەرەوەی دامەزراوە فەرمییەکانی حکومەت، ئەمەش جگە لە دەستەی حەشدی شەعبی کە زیاتر لە 250 هەزار ئەندام لەخۆدەگرێت.

 
لێدوانی فەرمی: فادی شەممەری، ڕاوێژکاری سیاسیی محەممەد شیاع سوودانی، سەرۆکوەزیرانی عێراق ڕایگەیاند: سەرکردەکانی بەرەی مقاوەمەی ئیسلامی، حکومەتی عێراقیان ئاگادارکردووەتەوە کە دوای ئەوەی هێزەکانی ئەمریکا و هاوپەیمانان لە عێراق دەکشێنەوە ئەوان  چەکەکانیان ڕادەستی حکومەت دەکەن و خۆیان هەڵدەوشێننەوە و ئەندامانیان لەگەڵ هێزە ئەمنییەکان تێکەڵ دەکەن.

 

زانیاریی زیاتر: ڕاوێژکارەکەی سوودانی، ئاماژەی بەوەشکرد هێزە چەکدارەکانی بەرەی مقاوەمە بەدەم بانگەوازەکانی حکومەت و چوارچێوەی هەماهەنگی بۆ ئاگربەست و دەستپێکردنی گفتوگۆی ڕاستەوخۆ و ناڕاستەوخۆ لەگەڵ لایەنی پەیوەندیدار چوون.

 

ئەمەش بزانە: سەبارەت بە دەنگۆی گۆڕانکاری لە سیستمی دەسەڵات لە عێراق،  شەممەری ڕەتیکردەوە و بە درۆیەکی پێکەنیناوی ناوی برد و وتی "ئەوەی باوەڕ بەو پروپاگەندانە بکات کە لە سوشیال میدیاکانەوە بڵاو دەکرێنەوە سەبارەت بە بابەتی گۆڕانکاری لە عێراق، کەسێکی گەمژەیە"