بەریتانیا: داوا لە سوورییەکان دەکەین دان بەخۆیاندا بگرن

ئاڤا نیوز

 

وەزارەتی دەرەوەی بەریتانیا ڕایگەیاند، "سووریا داهاتوویەکی ئاشتییانە و گشتگیری دەبێت، بەڵام تەنیا ئەگەر لە حاڵەتێكدا دووربکەونەوە لە توندوتیژی، ئەمەش لە بەرژەوەندی چارەسەری سیاسی و داوا لە سوورییەکان دەکەین دان بەخۆیاندا بگرن".

 

وێنە گەورەکە: ماوەی سێ ڕۆژە شەڕ و پێکدادانەکان لە نێوان سوپای سووریای نوێ و پاشماوەی چەکدارانی سەر بە بەشار ئەسەد لە لازقییە بەردەوامە و تاوەکو ئێستا بە هۆیەوە بە سەدان کەس کوژران.

 

لێدوانی فەرمی: هامیش فالکۆنەر، وەزیری دەوڵەت بۆ کاروباری ڕۆژهەڵاتی ناوەڕاست و باکوری ئەفریقا لە بەریتانیا، لە ئەکاونتی خۆی لە تۆڕی ئێکس ڕایگەیاند: سووریا داهاتوویەکی ئاشتییانە و گشتگیری دەبێت، بەڵام تەنیا ئەگەر لە حاڵەتێكدا دووربکەونەوە لە توندوتیژی، ئەمەش لە بەرژەوەندی چارەسەری سیاسی.

- داوا لە هەموو لایەنەکانی سووریا دەکەین لەم ساتەوەختە سەخت و گرنگەی مێژووی سووریا دان بەخۆیاندا بگرن.

 

لەلایەکی دیکە: ڕوانگەی سووری بۆ مافەکانی مرۆڤ ڕایگەیاند: لانیکەم تا ئێستا کوژرانی 304 هاووڵاتی سڤیل لە ناوچەکانی بانیاس، جەبلە و دەورووبەری، قەرداحە و لازقییە تۆمار کراون.

 

زانیاریی زیاتر: ژمارەی قوربانیان لە ماوەی 48 کاتژمێری ئەو شەڕەی کە لە کەناراوەکانی سووریا سەریهەڵدا، بۆ 213 کەس لە ڕیزەکانی سووپا و گرووپە چەکدارەکان بەرزبووەتەوە، ڕەنگە ژمارەکە زیاتریش بەرز ببێتەوە.
 
ژمارەکان وادەڵێن:

 

- ژمارەی کوژراوان لە ڕێزەکانی وەزارەتی بەرگریی و ناوخۆی سووریا بەرزبووەوە بۆ 93 چەکدار.

_ ژمارەی کوژراوان لە پاشماوەکانی ڕژێم بۆ 120 کەس بەرزبووەتەوە.

 

هۆکارەکان: ڕۆژی پێنج شەممە، 2025-3-6، پاشماوەکانی بەشار ئەسەد لە پارێزگای لازقییەی سووریا هێرشیان کردە سەر چەند بازگەیەکی هێزەکانی بەرگری و ناوخۆی سووریا و بەهۆیەوە دەیان ئەندامی ئەو هێزانە کوژران.