خەزعەلی داوای دەستوەردانی خێرا بۆ پاراستنی عەلەوییەکانی سووریا دەکات

ئاڤا نیوز

ئەمینداری گشتیی عەسائیب ئەهلی حەق، نیگەرانی قووڵی خۆی دەردەبڕێت سەبارەت بە زیادبوونی تووندوتیژییەکان لە سووریا بەتایبەتی لەو ناوچانەی کە لەژێر کۆنترۆڵی گرووپە چەکدارەکاندا ئەوانەی "مێژوویەکی تیرۆریستییان" هەیە.

 

وێنە گەورەکە: شەڕ و پێکدادانەکانی نێوان سوپای سووریای نوێ و پاشماوەی چەکدارانی سەر بە بەشار ئەسەد لە لازقیە پێدەنێتە ڕۆژی سێیەم و تاوەکو ئێستاش بە هۆیەوە بە سەدان کەس کوژران.

 

ڕاگەیێنراوی فەرمی: قەیس خەزعەلی، ئەمینداری گشتیی عەسائیب ئەهلی حەق، ڕایگەیاند: ئەم گرووپانە کە خۆیان لەژێر پەردەی هێزە ئەمنییەکان حەشارداوە، عەلەوییەکان دەکەنە ئامانج، پێویست بەوە دەکات هەنگاوی بە بەپەلە لەلایەن کۆمەڵگەی نێودەوڵەتییەوە بگیرێتە بەر بۆ پاراستنیان.

 

- بێدەنگی کۆمەڵگەی نێودەوڵەتی لە بەرامبەر ئەم کۆمەڵکوژییانە قبوڵکراو نییە و داوا لە وڵاتانی چالاک و ناچالاک لە گۆڕەپانی سووریا دەکەین بە بەرپرسیارێتی خۆیان هەستن و دەستێوەردان بکەن بۆ ڕاگرتنی ئەم پێشێلکاریانە و پاراستنی هاووڵاتیانی عەلەوی.

 

- پێویستە تووندوتیژییەکان بوەستێنرێن و کار لەسەر چارەسەرێکی سیاسی گشتگیر بکرێت کە مافەکانی هەموو سوریاییەکان بەبێ جیاوازی دەستەبەر بکات.

 

ئەوەی پێویستە بیزانیت: بە گوێرەی ئامارەکانی ڕوانگەی سووری بۆ مافەکانی مرۆڤ، ئاماری کوژراوەکان لە ڕیزەکانی سوپاو پاشماوەکانی ڕژێم و خەڵکی سڤیل بەرزبووەتەوە بۆ زیاتر لە 500 کەس.