گۆڕان هەڵبژاردنی ناوخۆیی دەکات و ڕێکخەر دەگۆڕێت

ئاڤا نیوز
 

بزووتنەوەی گۆڕان لە ڕۆژانی 13 و 14ـی ئەم مانگە هەڵبژاردنە ناوخۆییەكانی دەکات، لەو هەڵبژاردنەدا برپرسی نوێ هەڵدەبژێردرێن و ڕێکخەری گشتیش دەگۆڕدرێت.

 

وێنە گەورەكە: بزووتنەوەی گۆڕان دوو ساڵ جارێک هەڵبژاردنی ناوخۆیی دەكات، تێیدا ئەنجوومەنی مەكۆكان و دواتر ئەندامانی جڤاتی نیشتمانی و خانەكانی ڕاپەڕاندن هەڵدەبژێردرێن.

لێدوانی فەڕمی: سەرچاوەیەک لە بزووتنەوەی گۆڕان بە ئاڤا میدیای گوت: پێش ئەوەی هەڵبژاردنی هەرێمی كوردستان بكرێت، بزووتنەوەی گۆڕان لە ناوخۆدا هەڵبژاردن دەكات و ناوەڕاستی ئەم مانگە هەموو ڕێکارێکی هەڵبژاردنەكە تەواو دەبن.

زانیاریی تایبەت: ئاڤا نیوز زانیویەتی لەم هەڵبژاردنەدا بە ئەگەری 99% عومەر سەید عەلی، ڕێکخەری بزووتنەوەکە دەگۆڕدرێت.

ئەوەی پێویستە بیزانیت: لە هەڵبژاردنەکەدا باژێڕوان، سكرتێری مەكۆ و بەرپرسی دارایی هەڵدەبژێردرێن، بزووتنەوەی گۆڕان 25 مەكۆی هەیە، ئەمانە ڕاستەوخۆ دەبنە ئەندامی جڤاتی نیشتیمانی، ئەندامانی جڤاتی نیشتمانیش خانەی ڕاپەڕاندن و ڕێكخەری گشتی هەڵدەبژێرن.

 باکگراوند: نێوەڕاستی مانگی یەکی ئەمساڵ بزووتنەوەی گۆران بە دروشمی "گۆڕان بەرەو قۆناغێکی نوێ بۆ ڕووبەڕووبوونەوەی ئاڵنگارییەکان" لە گردی زەرگەتەی شاری سلێمانی دوهەمین کۆنفرانسی نیشتمانی خۆی سازکرد.