بەپێشنیازی فراكسیۆنی پارتی، زانكۆی كەركووک ڕێگەدەدات قوتابیان جلی كوردی بپۆشن

ئاڤا نیوز

 

دوای ڕووداوەکانی شازدەی ئۆکتۆبەری 2017، بۆ یەکەمجار لەسەر پێشنیازی فراکسیۆنی پارتی دیموکراتی کوردستان، زانکۆی کەرکووک ڕەزامەندی دا لەسەر پۆشینی جلی کوردی و نەتەوەیی بە قوتابیان لە ڕۆژی نەتەوەیی بۆ پۆشینی جلی کوردیدا.

 

چیرۆکی سەرەکی: فراکسیۆنی پارتی دیموکراتی کوردستان لە ئەنجوومەنی پارێزگای کەرکووک، ڕۆژی 9ـی ئادار، سەردانی سەرۆکایەتی زانکۆی کەرکووکی کرد بەمەبەستی تاوتوێکردنی چەند بابەتێک، یەکێک لەو بابەتانەی کە جێی بایەخی فراکسیۆنی پارتی بوو، ئەوەبوو؛ پێشنیازی بۆ سەرۆکی زانکۆی کەرکووک کرا کەوا لەڕۆژی نەتەوەیی بۆ پۆشینی جلی کوردی، قوتابیان و مامۆستایانی کورد بتوانن بە جلی کوردییەوە بێنە حەرەمی زانکۆ.

 

لێدوانی فەرمی: حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک تایبەت بە ئاڤا ڕایگەیاند، دوای خستنەڕووی پێشنیازەکەمان، شەوی ڕابردوو سەرۆکی زانکۆی کەرکووک بە سوپاسەوە ڕەزامەندی لەسەر داواکارییەکەمان دا و ئەمڕۆ قوتابیانی زانکۆ بە جلی کوردییەوە دەچنە دەوام.

 

ئەوەی پێویستە بیزانیت: دوای رووداوەکانی 16ـی ئۆکتۆبەر، هێزە عێراقییەکان دەستیان بەسەر بارەگاکانی پارتی لە کەرکووکدا گرتبوو. دوای شەش ساڵ و بەدیاریکراوی لە 26-11-2023، پارتی بارەگای لقی سێی خۆی لە شاری کەرکووک بە هەڵدانی هەزاران ئاڵای کوردستان کردەوە، کە لەسەر ئەرکی خۆیشی بارەگەکەی نۆژەنکردەوە.