حکومەتی عێراق و BP بۆ پەرەپێدانی کێڵگە نەوتییەکانی پارێزگای کەرکووک ڕێکدەکەون

ئاڤا نیوز

 

حکومەتی عێراق و کۆمپانیای بریتش پترۆڵیۆم BP بۆ پەرەپێدانی کێڵگە نەوتییەکانی پارێزگای کەرکووک ڕێککەوتن، وەزیری نەوتی فیدڕاڵیش دەڵێت، دەیانەوێت داهاتی عێراق لە نەوت و غاز زیاتر بکەن.

 

چیرۆکی سەرەکی: 15-01-2025 لە چوارچێوەی سەردانەکەی سەرۆکوەزیرانی عێراق بۆ لەندەن، وەزارەتی نەوتی عێراق و کۆمپانیای بریتش پترۆڵیۆم (BP) یاداشتێکی لێکتێگەیشتنیان بۆ نۆژەنکردنەوە و پەرەپێدانی کێڵگە نەوتییەکانی کەرکووک واژۆکرد.

 

ڕاگەیێنراوی فەرمی: وەزارەتی نەوتی عێراق بڵاویکردەوە، بە سەرپەرشتی حەیان عەبدولغەنی وەزیری نەوت، کۆمپانیای نەوت و غازی باکوور ڕێککەوتنی بۆ پەرەپێدانی کێڵگەکانی قوبەی بابا ‌و بای حەسەن و جمبور و ‌خەبازە لە سنووری پارێزگای کەرکووک، لەگەڵ کۆمپانیای بریتش پترۆڵیۆم (BP) واژۆکرد.

 

حەیان عەبدولغەنی وەزیری نەوت ڕایگەیاند، ڕێککەوتنەکە دەستکەوتێکی گرنگە و بەهۆیەوە ئاستی بەرهەمهێنانی نەوت و غازیش بۆ دابینکردنی کارەبای نیشتیمانی زیاتر دەبێت، لە دەرئەنجامیشدا داهاتە نەوتییەکانی دەوڵەت زیاتر دەبن ئەوەش کاریگەریی لەسەر زیادبوونی داهاتەکان لە بودجەدا دەبێت.

 

لەلایەکی دیکەوە: ڕۆژی 13ـی کانوونی دووەمی ئەمساڵ، دوای ڕاگەیاندنی لێکتێگەیشتنەکەی حکومەتی عێراق و کۆمپانیای (BP)، حکومەتی هەرێمی کوردستان ڕاگەیێنراوێکی بڵاوکردەوە و ڕایگەیاند: حکومەتی عێراق لە 20 ساڵی ڕابردوودا ڕیفراندۆمی لە ناوچەکانی سنووری ماددەی 140دا نەکردووە و چارەنووسی یەکلانەکردوونەتەوە، ئێستاش لە هەوڵی ئەوەدایە گرێبەستی نەوت و گاز واژۆ بکات بەبێ ئەوەی ماددەکانی دەستوور بەگشتی و ماددەی 140 و 112 بەتایبەت لەبەرچاو بگرێت، ئەمەش پێشێلکردنی دەستوورە و قبوڵی ناکەن.