ڕاپۆرتێکی ئەمریکی: بەشێک لە بەرپرسانی عێراق بڕوانامەکانیان ساختەیە

ئاڤا نیوز

بەپێی ڕێکخراوێکی ئەمریکی، بڕوانامەی بەشێکی زۆر لەبەرپرسانی عێراق ساختەیە، هاوکات بڕوانامەی بەشێکیش لەپزیشکان متمانەپێکراو نین.
 
چی ڕوودەدا: ڕێکخراوی "نیو میدیا لاین" ـی ئەمریکی لە ڕاپۆرتێکدا کە ئەمڕۆ چوارشەممە 08-10-2025 بڵاوی کردووەتەوە، ئاشکرای کردووە، بڕوانامەی ساختە لە عێراقدا گەیشتووەتە ئاستێکی مەترسیدار و هەڕەشە لە کەرتی ئەکادیمی، تەندروستی و کارگێڕی وڵاتەکە دەکات.

ڕاگەیێنروای فەرمی: ڕێکخراوەکە ڕایگەیاندووە: بەشێکی زۆر لە بەرپرسانی حکومی و خاوەنکار و وەبەرهێنەرانیش بڕوانامەی ساختەیان هەیە و لانی کەم 30%ـی پزیشکانی عێراق کە لە کەرتی گشتی و تایبەتدا کاردەکەن، خاوەنی بڕوانامەی متمانەپێکراو نین.

زانیاریی زیاتر: بەپێی ڕاپۆرتەکە، نرخی بڕوانامەی ماستەر لە نێوان پێنج هەزار بۆ 15 هەزار دۆلاردایە و دکتۆراش لە نێوان 10 هەزار بۆ 20 هەزار دۆلاردا دەفرۆشرێت لە زانکۆ تایبەتەکانی عێراق یان هەندێک زانکۆی دەرەکی، بەتایبەتیش لە لوبنان.

ئەمەش بزانە: ڕاپۆرتەکە ئەوەشی خستووەتەڕوو، ئەم دیاردەیە لەگەڵ گەشەکردنی زانکۆی تایبەت و کردنەوەی کەناڵی پەروەردەیی دەرەکی بێ متمانە فراوانبووە.