پەرلەمان بۆ دەسەڵاتی دادوەری: ڕێکاری یاسایی بەرامبەر ئەحمەد حاسوود بگرنەبەر

ئاڤا نیوز

دۆسیەی گەندەڵیی سەرۆکی دوورخراوەی ئەنجوومەنی پارێزگای نەینەوا بەرفراوان بووە، پەرلەمانی عێراق هاتە سەرهێڵ و داوا لە ئەنجوومەنی باڵای دادوەریی عێراق دەکات، ڕێکاری یاسایی بەرامبەر ناوبراو بگرنەبەر.

چیرۆکی سەرەکی: ئەحمەد حاسوود، سەرۆکی دوورخراوەی ئەنجوومەنی پارێزگای نەینەوا، دەرچووی بەشی وێژەیی بووە لە عێراق، دواتر بڕوانامەی پزیشکیی ددانی لە وڵاتی ئۆکراینا بەدەستهێناوە بێ ئەوەی بڕوانامەکەی هاوتا بکاتەوە، بەو پێیەش بێت بڕوانامەکەی نایاساییە و لەسەر ئەم بابەتەوە و چەند بابەتێکی دیکە لە پۆستەکەی دوورخراوە.

نووسراوی فەرمی: خالد حەسەن سامەرائی، سەرۆکی لیژنەی هەرێم و پارێزگاکان لە پەرلەمانی عێراق نووسراوێکی ئاڕاستەی ئەنجوومەنی دادوەریی کردووە، داوای لێدەکات ڕێکاری یاسایی لە بابەتی بەکارهێنانی دەستەواژەی "دکتۆر" لەلایەن ئەحمەد حاسوود بگرنەبەر.

زانیاریی زیاتر: ئەحمەد حاسوود ناونیشانی زانستیی ساختەی لە نووسراوە فەرمییەکان بەکارهێناوە، ئەمەش نایاسایییە، چونکە بڕوانامەکەی لە عێراق باوەرپێکراو نییە.

ئەوەی پێویستە بیزانیت: حاسوود سکاڵای دژی بڕیارەکەی ئەنجوومەنی پارێزگا تۆمارکرد، بەو هۆیەوە دادگای کارگێڕیی عێراق بڕیاریدا، بڕیاری دوورخستنەوەی جێبەجێ نەکرێت تاوەکو سکاڵاکەی یەکلا دەکاتەوە.

باکگراوند: لە هەفتەی ڕابردوو، ئەندامانی ئەنجوومەنی پارێزگای نەینەوا لە دانیشتنێکدا، لێپرسینەوەیان لەگەڵ ئەحمەد حاسوود، سەرۆکی ئەنجوومەنەکە کرد و بە دەنگی 16 ئەندام لە کۆی 29 ئەندامی ئەنجوومەنەکە بڕیاریان دا لە پۆستەکەی دووریبخەنەوە.