ئەمریکا داوا لە عێراق دەکات هەناردەی نەوتی کوردستان دەستپێبکاتەوە

ئاڤا نیوز

ئەمریکا جارێکی دیکە داوا لە سوودانی دەکات دەست بە هەناردەکردنەوەی نەوتی کوردستان بکرێتەوە و دەڵێت، هەناردەکردنەوەی نەوتی کوردستان بۆ بەهێزکردنی پەیوەندیی هاوبەشی بازرگانی و ئەمنی گرنگە.

وێنە گەورەکە: مایک واڵتز، ڕاوێژکاری ئاسایشی نیشتمانی ئەمریکا  پەیوەندی بە محەممەد شیاع سوودانی، سەرۆکوەزیرانی عێراق کردووە، لە پەیوەندییەکەدا باسی دووبابەتیان کردووە.

ئەوەی پێویستە بیزانیت: لەو کاتەوەی ترەمپ بووەتەوە سەرۆکی ئەمریکا، واشنتن دووجار پەیوەندی بە سوودانییەوە کردووە، هەردوو جاریش گفتوگۆیان لربارەی هەرێمی کوردستانەوە کردووە.

ئەمەش بزانە: ڕاوێژکاری ئاسایشی نیشتمانی ئەمریکا  شەوی ڕابردوو دوو پەیامی بە سوودانی داوە:

یەکەم؛ ئابووری:

- نابێت غەدر لە کۆمپانیا ئەمریکی و نێودەوڵەتییەکان بکرێت لە عێراق، بەتایبەت ئەوانەی لە کەرتی نەوتی کوردستان کار دەکەن، دەبێت داواکارییەکانیان جێبەجێ بکرێن و قەرز و شایستە داراییەکانیان پێبدرێت. 

- داوای لە سوودانی کردووە، لەگەڵ کۆمپانیاکان و حکومەتی هەرێمی کوردستان کار بکات بۆ چارەسەرکردنی ناکۆکییەکان.

- جەختیشی کردووەتەوە کە هەناردەکردنەوەی نەوتی کوردستان گرنگە بۆ بەهێزکردنی پەیوەندی هاوبەشی بازرگانی و ئەمنی، پەیوەندییەکان بەهێزتر دەبن و هەموولایەک براوە دەبن.

- داواشی کردووە حکومەتی عێراق ڕێکخەرێکی وەبەرهێنان دابنێت بۆ کارکردن لەگەڵ کۆمپانیا ئەمریکییەکان کە دەیانەوێت لە عێراق کار بکەن.

دووەم؛ ئەمنی: ڕاوێژکاری ئاسایشی نیشتمانی ئەمریکا  بەڕوونی ئەو پەیامەی بە سوودانی داوە کە بەهیچ شێوەیەک بەخشین لە کڕینی گازی ئێران بۆ عێراق درێژناکاتەوە، وتوویەتی ئەمە سەرەتای سزاکانە، ئەگەر تەداخول و ڕۆڵی ئێران لە عێراق بمێنێت، سزاکان زیاتر دەبن و بەهیچ شێوەیەک نابێت ئێران سوود لە دۆلاری عێراق وەربگرێت و سەرچاوەکانی لێ وشک دەکەن. ئەمەش بەو ئامانجەی پەرە بە چەکی ئەتۆمی نەدات و پاڵپشتی تیرۆرستان نەکات بە گرووپە چەکدارەکانی عێراقیشەوە