دۆسیەی زیاتر لە 25 هەزار زیندانی سیاسیی هەرێمی کوردستان گواستراوەتەوە سەر عێراق

ئاڤا نیوز

 

گواستنەوەی مامەڵەی زیندانیان و گیراوی سیاسی لە وەزارەتی شەهیدان و ئەنفالکراوانی هەرێمی کوردستان سەرجەم ڕێکارەکانی بڕیوە و 25 هەزار و 807 مامەڵەکانیان گواستراوەتەوە سەر دەزگای زیندانیانی سیاسی عێراق.

 

وێنە گەورەکە: بە گواستنەوەی دۆسیەی زیندانیانی سیاسیی بۆسەر دەزگای زیندانیانی سیاسی عێراق کۆمەڵێک ماف و ئیمتیازی پێدەدرێت کە زیادبوونی مینحە، قەرەبووکردنەوەی ئەو ڕۆژانەی لە زیندانبوون، پێدانی زەوی و پارە بۆ کڕینی یەکەی نیشتەجێبوون و دابینکردنی بڕێک بۆ چارەسەر یان خوێندن یاخود حەج و عومرە.

 

لێدوانی فەرمی: ئەحمەد مام ڕەسووڵ، بەرێوەبەری گشتیی خزمەتگوزاری کەسوکاری شەهیدان و ئەنفالکراوان بە ئاڤای گوت، "بەپێی یاسای ژمارە 4ی ساڵی 2006 کە بە یاسای ژمارە 35ی ساڵی 2013 هەموار کراوەتەوە، بە گواستنەوەی زیندانیانی سیاسی هەرێمی کوردستان بۆسەر دەزگای زیندانیانی سیاسی عێراق سودمەند دەبێت لەهەموو ئەو ماف و ئیمتیازاتانەی زیندانیانی سیاسی لە عێراق لێی سوودمەندن."

 

گوتیشی، "17هەزار و 537 کەس کە هێشتا ڕێکارەکانی مامەڵەی زیندانی سیاسیان و دۆسیەکانیان تەواو نەبووە چاوەڕێی پشتڕاستکردنەوەی دۆسیەکانیان دەکرێت."

 

خاڵە ئەرێنییەکان: ئەو ماف و ئیمتیازاتانەی کە زیندانیانی سیاسیی هەرێمی کوردستان بە گواستنەوەی دۆسییەکانیان سوودمەنددەبن بریتین لە:-

مینحەی زیندانیانی سیاسی دەبێتە یەک ملیۆن و 200 هەزار دینار.

-پارچەیەک زەوینان پێدەدرێت.

-قەرەبووی ئەو ڕۆژانەیان بۆ دەکرێتەوە کە لەزیندان بوونە.

-بڕێک پارەیان پێدەدرێت بۆ دروست کردنی یەکەی بیشتەجێبوون.

-پێنج ملیۆن دیناریان بۆ یەکێک لەو مەبەستانە بۆ خەرج دەکرێت، 'چارەسەر و خوێندن لە ناوەوە و دەرەوەی وڵات، حەج و عەمرە.