پرۆژەی فریاگوزاریی خێرای ئاوی هەولێر 67%ی تەواو کراوە

ئاڤا نیوز 

 

پرۆژەی فریاگوزاریی خێرای ئاوی هەولێر 67%ی کارەکانی تەواو بووە، لەگەڵ تەواوبوونی پڕۆژەکەش کێشەی کەمئاوی هەولێر تاوەکو 25 ساڵی دیکە چارەسەر دەبێت.

 

چیرۆکی سەرەکی: سەرۆکوەزیران مەسرور بارزانی، لە ڕێککەوتی 9-8-2024، بەردی بناغەی پرۆژەی فریاگوزاری خێرایی ئاوی هەولێری دانا، ئەم پرۆژەیە بەیەکێک لەپرۆژە سەرەکییەکانی کابینەی نۆیەمی حکومەتی هەرێمی کوردستان دادەندرێت، ژمارەیەکی زۆر بیری ئاو دادەخرێت کە پێشتر بۆ دابینکردنی ئاوی ماڵان پشتی پێدەبەسترا.

 

لێدوانی فەرمی: ئاری ئەحمەد، بەڕێوەبەری گشتی ئاو و ئاوەڕۆی هەرێمی کوردستان، بە ئاڤا میدیای ڕاگەیاند: پێشبینی دەکەین سەرەتایی مانگی حەوت بەشێک لە وێستگەکانی پرۆژەکە و یەکێک لە هێڵە سەرەکییەکان تەواو بێت و کار بکات، تا کۆتایی ئەمساڵ لە 100% پرۆژەکە دەکەوێتە کار و تەواو دەبێت.

 

زانیاریی زیاتر: ئەو هێڵەی لە سەرەتایی مانگی حەوت تەواو دەبێت دەکەوێتە سنووری شارەوانییەکانی چوار و پێنج و شەش، لە دەرەوەی بازنەی 120 مەتری، هاوکات هەردوو پرۆژەی فریاگوزاری و پرۆژەی بەستنەوەی تۆڕەکان لە هێڵە سەرەکییەکانی فریاگوزاریی ئێستا لە کارکردن کە نزیکەی 411 کیلۆمەتر دەبێت لەلایەن کۆمپانیایەکی ناوخۆی جێبەجێدەکرێت، هێڵە سەرەکییەکانی پرۆژەی فریاگوزاری بە تۆڕەکانی گەڕەکەکان دەبەستێتەوە.