ڕێباز حەملان: لێبڕینی 3٪ـی خانەنشینی بۆ نانەوەی کێشەیە

ئاڤا نیوز

 

بریکاری دەستلەکارکێشاوەی وەزارەتی دارایی عێراق سەبارەت بە بیانووکانی بەغدا و دروستکردنی کێشە لەبەردەم ناردنی مووچەی مووچەخۆرانی هەرێمی کوردستان ڕوونکردنەوە دەدات و دەڵێت، "لێبڕینی 3٪ـی خانەنشینی بۆ دروستکردنی کێشەیە ".

 

وێنە گەورەکە: ڕۆژی سێشممە ڕێککەوتی 11ـی 3ـی  2025، ڕێباز حەملان، بریکاری دەستلەکارکێشاوەی وەزارەتی دارایی عێراق لە گەشتی هەواڵەکانی سەعات حەوتی ئاڤا میدیا بەشداری کرد و وەڵامی چەند پرسیارێکی پەیوەست مووچە، لیستی مووچەی فەرمانبەرانی هەرێمی کوردستان و هۆکاری دەستلەکارکێشانەوەی لە پۆستی بریکاری وەزارەتی دارایی عێراق، دایەوە.

 

لێدوانی فەرمی: ڕێباز حەملان، بریکاری دەستلەکارکێشاوەی وەزارەتی دارایی عێراق ڕایگەیاند: مانگانە لیژنەی چاودێری دارایی عێراق لە هەرێمی کوردستانن و لە ئامادەکردنی لیستی مووچە و وردبینیکردن و میزان موراجەعە بەشدارن، واتە کە لیستەکە بۆ بەغدا دەنێردرێت، پێویستی بە وردبینی دیکە نابێت، کەچی وردبینی تێدا دەکەن.

 

زانیاریی زیاتر: ڕێباز حەملان باسی کۆبوونەوەکەی ئۆتێل بەغدا دەکات و دەڵێت، لەو کۆبوونەوەیەدا باس لەوەکرا کە لیستی مووچەی مانگی یەک بکرێتە بناغە بۆ مانگەکانی دیکە، بەڵام باسی لێبڕینی 3٪ی خانەنشینی نەکرا، کەچی ئێستا بەغدا باسی ئەو لێبڕینە دەکەن بۆ دروستکردنی کێشە.

 

زانیاریی بەدەستهاتوو: "لیژنەی چاودێریی دارایی عێراق، باسیان لە چارەسەرکردنی زۆربەی شتەکان کرد، وتیان تەنیا چەند هەزار خانەنشین بایۆمەترییان نەکردووە، ئەوانیش لە دەرەوەی کوردستانن، یان قاسەرەکانیان [میراتگری خوار تەمەن 18 ساڵ] بایۆمەتری نایانگرێتەوە، یان هەندێکیان مۆڵەتی بێ مووچەیان بۆ یەک دوو ساڵ کردووە، واتە لەسەر لیستی مووچەی مانگی یەک کێشەیان نەبوو.