سوودانی نووسراو بۆ چارەسەرکردنی کێشەی جووتیارانی کەرکووک دەردەکات

ئاڤا نیوز

سوودانی بە نووسراوی فەرمی ڕەزامەندی لەسەر ڕاسپاردەکان دەدات بۆ چارەسەرکردنی کێشەی جووتیارانی کەرکووک و گەڕاندنەوەی زەوییەکانیان، کە دوێنێ ئێوارە داوایان لە سەرۆکوەزیران مەسرور بارزانی کرد وەکو حکومەتی کوردستان لەگەڵ بەغدا کاری لەسەر بکەن و پەلە لە دەرکردنی نووسراوەکە بکرێت.

چیرۆکی سەرەکی: دوێنێ ئێوارە مەسرور بارزانی، سەرۆکوەزیرانی کوردستان بەربانگی لەگەڵ  پێشمەرگە و جووتیارانی کورد لە کەرکووک کردەوە، جووتیارانیش دڵخۆش بوون بەوەی لەبیری نەکردوون و لە سەرەتای دۆزەکەیان لەگەڵیان بووە، بەدەمیانەوە چووە و پشتیوانی کردوون، داواشیان کرد پەلە بکرێت لە دەرکردنی نووسراوی ئەمینداریەتیی گشتیی ئەنجوومەنی وەزیرانی عێراق بۆ چارەسەرکردنی کێشەکە، سەرۆکوەزیرانیش دڵنیایی لەلایەن سەرۆک مەسعود بارزانی و حکومەتەوە پێدان کە بەردەوام دەبن لە گفتوگۆکردن لەگەڵ بەغدا بۆ چارەسەرکردنی کێشەکەیان.

ئەوەی پێویستە بیزانیت: دوای دروستبوونی کێشە لەنێوان جووتیارانی کەرکووک و سوپای عێراق لەسەر کێڵانی زەوییەکانیان لە مانگی ڕابردوودا، محەممەد شیاع سوودانی، سەرۆکوەزیرانی عێراق و فەرماندەی گشتیی هێزە چەکدارەکان لیژنەیەکی ناردە کەرکووک بۆ ئەوەی کار لەسەر کێشەکە بکەن و پێشنیاز و ڕاسپاردەی بۆ بەرز بکەنەوە، دووی ئەم مانگەش ئەمینداریەتی گشتیی ئەنجوومەنی وەزیرانی ڕاسپارد ڕێنمایی تایبەت دەربکات بۆ جێبەجێکردنی یاسایی گەڕاندنەوەی زەوییەکان بۆ خاوەنەکانیان لە کەرکووک و سنووری ماددەی 140 کە لە سەردەمی ڕژێمی بەعس بە عەرەبە هاوردەکان درابوون.

نووسراوی فەرمی: بەگوێرەی نووسراوێک کە بە نهێنی و بە ژمارە 3026/2582608 دەرچووە، ئاراستەی سەرجەم وەزارەتەکان کراوە و وێنەیەکی دەست ئاڤا میدیا کەوتووە، سوودانی ڕەزامەندی لەسەر ڕاسپاردەکانی ئەو لیژنەیە داوە کە بۆ کێشەی جووتیاران پێکهێنراوە. لە نووسراوەکەدا هاتووە: "تکایە پێداچوونەوە بکەن و ڕێنمایی دەر بکەن بۆ گرتنەبەری ڕێوشوێنی پێویست سەبارەت بە جێبەجێکردنی بڕگەی (6)ی ڕاسپاردەکانی کۆنووسی لیژنەی ئاماژەپێکراو و ئاگادارمان بکەنەوە". بەڵام لە نووسراوەکەدا ئاماژە بە ڕاسپاردەکان نەکراوە.