وەزارەتی ناوخۆ کارەکانی 200 کۆمپانیای هێنانی کرێکاری بیانی ڕادەگرێت

 

ئاڤا نیوز

خاوەنی کۆمپانیاکانی ڤیزە و ئیقامە لە هەرێمی کوردستان، گازەندەی داخستن و ڕاگرتنی کارەکانیان لەلایەن حکومەتەوە دەکەن، سەرۆکی دیوانی وەزارەتی ناوخۆش دەڵێت 'ئەو کۆمپانیایانە کرێکاریان هێناوە و دەستبەرداریان بوون'.

چیرۆکی سەرەکی: نزیکەی 200 کۆمپانیای ڤیزە و ئیقامە کە ڕێگەپێدانی وەزارەتی ناوخۆی هەرێمی کوردستانیان هەیە، هەریەک لەو کۆمپانیایانە 100 هەزار دۆلاریان وەکو تەئمینات خەواندووە، وەک خاوەنی کۆمپانیاکان دەڵێن حکومەت بەبێ ئاگادارکردنەوە هەموو کارەکانی ڕاگرتوون، بەبێ ئەوەی بەدیلیان بۆ دابنێت، یان تەئمیناتەکەیان بۆ بگەڕێنێتەوە، نزیکەی نۆ مانگە بێ کار دانیشتووین.

لێدوانی فەرمی: هێمن میرانی، سەرۆکی دیوانی وەزارەتی ناوخۆی حکومەتی هەرێمی کوردستان، بە ئاڤا میدیای ڕاگەیاند:

٠ داخستن و ڕاگرتنی کاری ئەو کۆمپانیایانە بۆ ئەوەیە چیتر کرێکاری بیانی نەهێنن، هەیانە بە هەزاران کرێکاری هێناوە و لێرە دەستبەرداریان بوونە، یان کرێکاریان ون بووە، یان کرێکاریان چووەتە بەغدا، ئەمەش لە ناوبانگی هەرێمی کوردستان دەدات.

٠ شەش مانگ جارێک کۆمپانیاکان دەبێت بێن و ئەستۆپاکی خۆیان بکەن، ئەگەر کرێکاریان ونبووبێت بەگوێرەی ڕینمایی سزا دەدرێن، تاوەکو ئێستا دوو جار داشکاندن بۆ سزاکەش کراوە، دوای سزادانەکە ئەگەر کۆمپانیاکە ویستی دەتوانن لە کارکردندا بەردەوامبێت، ئەگەرنا نووسراویان بۆ دەکەین و دەتوانن تەئمیناتەکەیان وەربگرنەوە.

زانیاری زیاتر: بە بڕیاری ژمارە 172ـی ئەنجوومەنی وەزیران هەر کۆمپانیایەکی ناوخۆیی، یان بیانی لە هەرێمی  کوردستان کار بکات و بیەوێت کرێکاری بیانی بهێنێت، دەبێت 75٪ـی کرێکارەکانی کوردبن، بۆی هەیە تەنیا 25٪ـی کرێکاری بیانی بهێنێت.

بۆچی گرنگە: بڕیارەکەی ئەنجوومەنی وەزیران و هەنگاوەکەی وەزارەتی ناوخۆ، بۆ کەمکردنەوەی دەستی کاری بیانیی و زیادکردنی دەستی کاری ناوخۆیە.