ئەمریکا پێشوازی لە ڕێککەوتنەکەی سووریا دەکات

ئاڤا نیوز

وەزیری دەرەوەی ئەمریکا پێشوازی لە ڕێککەوتنی نێوان هێزەکانی سووریای دیموکرات 'هەسەدە' و حکومەتی نوێی سووریا کرد و پشتگیری وڵاتەکەی بۆ سووریایەکی یەگرتوو نیشان دا.

وێنە گەورەکە: لە دوای ڕووخانی ڕژێمی ئەسەد، یەکخستنەوەی هێزە چەکدارەکانی سووریا ئامانجی سەرەکی ئیدارەکەی ئەحمەد شەرع، سەرۆککۆماری سووریا بۆ قۆناغی ڕاگوزەر بوو، تا لە کۆتاییدا لە 2025-03-10، ڕێککەوتنێکی هەشت خاڵی لە نێوان مەزڵوم عەبدی و شەڕع واژۆکرا کە هێزەکانی هەسەدە دەخاتە نێو هێزی بەرگری سووریا.

ڕاگەیێنراوی فەرمی: مارکۆ ڕۆبیۆ، وەزیری دەرەوی ئەمریکا ڕایگەیاند:

٠ ئەمریکا پێشوازی لەو ڕێککەوتنە دەکات کە لەم دواییانەدا لە نێوان دەسەڵاتدارانی کاتی سووریا و هێزەکانی سوریای دیموکراتدا ڕاگەیەندرا بۆ یەکخستنی باکووری ڕۆژهەڵات بۆ سوریایەکی یەکگرتوو.

٠ ئەمریکا پشتگیری خۆی بۆ گواستنەوەی سیاسی دووپات دەکاتەوە کە حوکمڕانی باوەڕپێکراو و دوور لە تایفەگەری وەک باشترین ڕێگا بۆ دوورکەوتنەوە لە ململانێی زیاتر نیشان دەدات.

٠ ئێمە بەردەوام دەبین لە چاودێریکردنی ئەو بڕیارانەی کە لەلایەن دەسەڵاتە کاتیەکانەوە دراون، نیگەرانین لە توندوتیژییەکانی ئەم دواییە لە دژی کەمینەکان دەکرێت.

لەلایەکی دیکەوە: فەرەنسا پێشوازی لە ڕێککەوتنەکە دەکات بەوەی کە کورد  بەشداری لە پڕۆسەی سیاسی بکات و مافەکانی زامن بکرێت.

هاوکات، پابەندبوونی خۆی بۆ هێنانە کایەی پڕۆسەیەکی ڕاگوزەریی سیاسی ئاشتیانە ڕادەگەیێنێت کە هەموو پێکهاتەکان لە خۆ بگرێت. ئەمەش لە پێناو بوونیادنانی سووریایەکی ئازاد و یەکگرتوو و سەقامگیر.

قووڵتر: ئیدارەی خۆسەری کورد کە هێزەکانی سووریای دیموکرات 'هەسەدە' کۆنترۆڵیان کردووە ناوچەیەکی فراوان لە باکوور و ڕۆژهەڵاتی سووریا دەگرێتەوە، هەروەها دیارترین کێڵگە نەوتی و غازییەکانیش لەخۆدەگرێت، بەجۆرێک زۆرترین بەرهەمی سامانی سرووشتی سووریا لەو ناوچانەدا بەرهەمدەهێنرێن و بە ڕێککەوتنی کورد لەگەڵ حکومەتی ڕاگوزەری ئەو وڵاتە ئابووری سووریا دەبوژێنێتەوە و مافی کوردیش لە حکومەتی سووریا جێگیردەکرێت.