سەرۆكوەزیران مەسرور بارزانی: بە زووترین كات لیستی مووچەی مانگی ئازار ئامادە بكرێت

ئاڤا نیوز

ئەنجوومەنی وەزیرانی هەرێمی كوردستان كۆبووەوە، لەمیانەدا سەرۆکوەزیران مەسرور بارزانی، وەزارەت و دامەزراوەکانی ڕاسپارد هەرچی زووە لیستی مووچەی مانگی ئازار ئامادە بکەن.

وێنە گەورەكە: ئەمڕۆ چوارشەممە 12-3-2025، بە سەرپەرشتيی سەرۆکوەزیران مەسرور بارزانی و ئامادەبوونی قوباد تاڵەبانی، جێگری سەرۆکوەزیران، ئەنجوومەنی وەزیرانی هەرێمی کوردستان کۆبووەوە و لەمیانەدا چەند پرسێك تاووتوێ كران و چەند بڕیارێكیش دران.

ڕاگەیێنراوی فەرمی: بەپێی ڕاگەیێنراوی فەرمانگەی میدیا و زانیاریی، ئەمانەی خوارەوە ناوەڕۆك و ئەنجامەكانی كۆبوونەوەی ئەمڕۆی ئەنجوومەنی وەزیرانن:-

- لێخۆشبوون لە قیستەکانی سوودمەندانی قەرزی بچووک لە ساڵانی پێشوو کە سوودمەندەکانیان کۆچی دواییان کردووە.

- سەرۆکوەزیران مەسرور بارزانی، وەزارەت و دامەزراوەکانی ڕاسپارد هەرچی زووە لیستی مووچەی مانگی ئازار ئامادە بکەن بۆ ئەوەی بۆ وەزارەتی دارایی فیدراڵ بنێردرێت و پێش جەژن مووچەکە بدرێ.

- ئەنجوومەنی وەزیران جەختی لە هەڵوێستی نەگۆڕی حکومەتی هەرێمی كوردستان کردەوە بۆ جێبەجێکردنی هەمواری یاسای بودجە بە ئاراستەی هەناردەکردنەوە و فرۆشتنی نەوتی هەرێمی هەرێمی كوردستان.

- گفتوگۆ لەبارەی دیاریکردنی ڕۆژەکانی پشوو و بۆنە فەرمییەکان لە ڕۆژژمێری حکومەتی هەرێمی کوردستان کرا و لایەنە پەیوەندیدارەکان ڕاسپێردران ڕێكکاری یاسایی و تەشریعیی پێویست لەمبارەیەوە بگرنە بەر.