ئەنجوومەنی نیشتمانیی سووریا بە سەرۆکایەتی شەرع پێکدەهێنرێت

ئاڤا نیوز

 

سەرۆککۆماری سووریا بۆ قۆناغی ڕاگوزەر بڕیاری پێکهێنانی ئەنجوومەنی نیشتمانیی وڵاتەکەیدا و خۆی سەرۆکایەتی دەکات، ئەویش بە ئامانجی بەهێزکردنی ئاسایش و وەڵامدانەوەی ئاستەنگییە سیاسیی و ئەمنییەکان لە قۆناغی داهاتوودا.

 

بۆچی گرنگە: پێکهێنانی ئەنجوومەنی نیشتمانیی سووریا هاوکاتە لەگەڵ گرژییەکانی هەفتەی ڕابردووی پارێزگا کەناراوییەکانی ئەو وڵاتە کە بەهۆیەوە سەدان هاووڵاتی کوژران، ئەوەش زیانی بەو پشتیووانییە هەرێمیی و نێودەوڵەتییە گەیاند کە دەسەڵاتی نوێی سووریا بەدەستیهێنابوو.

 

ڕاگەیێنراوی فەرمی: سەرۆکایەتیی کۆماری سووریا بڵاویکردەوە، ئەنجوومەنی نیشتمانیی سووریا، ئەحمەد شەرع سەرۆککۆمار بۆ قۆناغی ڕاگوزەر سەرۆکایەتی دەکات و کاری درووستکردنی هەماهەنگیی و بەڕێوەبردنی سیاسەتی ئەمنیی و سیاسیی دەوڵەت دەبێت.

 

ئەوەی پێویستە بیزانیت: ئەندامەکانی ئەنجوومەنەکە پێکدێن لە:

وەزیری دەرەوە

وەزیری بەرگری

بەڕێوەبەری دەزگای هەواڵگری

دوو کورسی ڕاوێژکاری کە سەرۆککۆمار بەگوێرەی لێهاتوویی و ئەزموون دیارییان دەکات

کورسییەکی تەکنیکی سەرۆککۆمار دیاری دەکات و ئەرکی چاودێریکردنی کاروباری تەکنیکی و کرداری ئەنجوومەنەکە دەبێت

 

زانیاریی زیاتر: هەر بەگوێرەی بڕیارەکە کۆبوونەوەکانی ئەنجوومەنەکە خولی و لەسەر داوای سەرۆککۆمار دەبن، لە بابەتی دۆسیەی ئەمنیی و ئاستەنگییەکاندا بە ڕاوێژ بڕیار دەدرێت، ئەرکەکان و چۆنییەتی کارکردنیشی بە ڕاسپاردەی سەرۆککۆمار دیاری دەکرێن بەجۆرێک گەرەنتی هەماهەنگی کارایی هەموو دەزگا و دامەزراوەکان بکات.