لە 11 ناوچەی شرناخ بۆ ماوەی 15 ڕۆژ سنوورەکان داخران

ئاڤا نیوز

بە بڕیاری پارێزگای شرناخ لە باکووری کوردستان، لە 11 ناوچەی نێوان چیای گابار و جودی بۆ ماوەی 15 ڕۆژ سنوورەکان داخران، بە هەموو شێوەیەک چوونە ناو شارەکە و دەرچوون لێی قەدەغەکرا، ئەمەش بە مەبەستی پاراستنی ئاسایشی ناوچەکە.

بۆچی گرنگە: دەرکردنی ئەم بڕیارە لە کاتێکدایە کە کوردانی ئەو ناوچەیە خۆیان ئامادە دەکەن بۆ ئەوەی ئاهەنگی پرۆسەی ئاشتی و جەژنی نەورۆز بگێڕن.

هۆکارە زانراوەکان: ئەم بڕیارە لە پێناو دەستەبەرکردنی ئاسایشی نەتەوەیی،  پاراستنی  ئاسایشی گشتی،  ڕێگریکردن لە تاوان و پاراستنی ماف و ئازادییە بنەڕەتییەکان، ڕێگریکردن لە ڕووداوی توندوتیژی و ڕێگریکردن لە هەر بارودۆخێکی نەرێنی کە لەوانەیە ڕووبدات، دەرکراوە.

ڕاگەیێنراوی فەرمی: پارێزگاری شرناخ ڕایگەیاند، بە پێی یاسای ناوچە قەدەغەکراوەکانی سەربازی و  ناوچەی ئەمنی تایبەت، بڕیارماندا ئەو 11 ناوچەیەی دەکەوێتە نێوان چیای گابار و جودی لەلایەن پارێزگاری شارەکە وەک ناوچەی "ئەمنی تایبەت" ناساند و بۆ ماوەی 15 ڕۆژ چوونە ژوورەوەی بۆ ناو شارەکە قەدەغە کرد.