لە ڕێگەی تیمێکی گەڕۆکەوە پشکنینی شێرپەنجەی مەمک بۆ ژنان دەکرێت

ئاڤا نیوز

 

بەڕێوەبەرایەتیی کاروباری پاراستنی تەندروستی هەولێر بە هەمانگی لەگەڵ سەنتەری ڕاهێنان و پێشەیی تیمێکی گەڕۆک بۆ پشکنینی شێرپەنجەی مەمکی ژنان پێکدەهێنن. 

وێنە گەورەکە: بەمەبەستی پێشگرتن لە تەشەنەکردنی زیاتری نەخۆشی شێرپەنجەی مەمک لەنێو ژنانی سنووری پارێزگای هەولێردا، تیمێکی گەڕۆکی تایبەت پێکهێنراوە کە هەرجارەو لە بنکەیەکی تەندروستی پشکنین بۆ ژنان دەکەن. 

لێدوانی فەرمی: د. دلۆڤان محەممەد، بەڕێوەبەری گشتیی تەندروستی هەولێر، بە ئاڤا میدیای ڕاگەیاند، به‌ڕێوه‌به‌رایه‌تیى كاروبارى پاراستنى ته‌ندروستى هه‌ولێر دروستكردنى تیمه‌ گه‌ڕۆكه‌كانى بۆ سنووری پارێزگای هەولێر راگه‌یاندووە كه‌ مه‌به‌ست لێی پشكنینى مه‌مۆگرافی ژنانه‌ بۆ ئه‌م نه‌خۆشییه‌.

- هەرجارەو له‌بنكه‌یه‌كى ته‌ندروستى ئه‌م پشكنینه‌ بۆ ژنان ده‌كرێت، بۆ ئه‌وه‌ى زووتر ده‌ستنیشانى نه‌خۆشییه‌كه‌یان بكرێت، چونکە ئەگەر زوو نەخۆشییەکە دیاری بکرێت بە ئاسانی دەتوانرێت چارەسەریش بکرێت.

ئەوەی پێویستە بیزانیت: دوای بڵاوبوونەوەی ئامارەکانی تووشبوون بە نەخۆشیی شێرپەنجە لەلایەن بەشێک لە میدیاکان و سەرچاوە عێراقییەکان، بەڕێوەبەرایەتیی گشتیی تەندروستیی هەولێر ئه‌وه‌ى ڕه‌تكرده‌وه‌ كه‌ هاووڵاتیانی ‌هه‌ولێر بە ڕێژەی بەرز تووشبووبن بە نەخۆشی شێرپەنجە، ئاماژەی بەوەداوە 49%ی نەخۆشانی شێرپەنجە خەڵكی ئاوارە و پەناهەندە و دەرەوەی هەرێمی کوردستانن.

ئەمەش بزانە: به‌پێی دوایین ئامار كه‌ بەڕێوبەرایەتیی گشتیی تەندروستیی هەولێر بڵاویكرده‌وه‌، ساڵی 2024 ژماره‌ى تووشبووانی شێرپەنجە چوار هه‌زار و 983 كه‌س بووه‌ كه‌ به‌راورد به‌ ساڵى 2023 ژماره‌كان كه‌متره‌ كه‌ ئه‌ویش پێنج هه‌زار و 456 توشبوو بووه‌.