هێمن میرانی: سیستمی نوێی مۆڵەتی شۆفێری وەرچەرخانێكە لەبواری هاتووچۆی كوردستان

ئاڤا نیوز

بەڕێوەبەری گشتیی دیوانی وەزارەتی ناوخۆی هەرێمی كوردستان ڕایدەگەیەنێت، سیستمی نوێی ڕاهێنانی شۆفێری، تازەپێگەیشتووان بە زانستی هاتووچۆی سەردەم، یاسا و ڕێسا نێودەوڵەتییەكانی سەلامەتیی ڕێگاوبان و جۆر و پارچە و لایەنی میكانیكییەكانی ئۆتۆمبێلەكان، ئاشنا دەكات.

وێنە گەورەكە: هێمن میرانی، بەڕێوەبەری گشتیی دیوانی وەزارەتی ناوخۆی هەرێمی كوردستان و ژمارەیەك بەرپرسی دیكەی دیوانی وەزارەت لەگەڵ ژمارەیەك ئەفسەری باڵای هاتووچۆی هەرێمی كوردستان كۆبووەوە، تەوەری سەرەكی كۆبوونەوەكەش تاوتوێكردنی بایەخ و گرنگی سیستمی نوێی شۆفێری بوو.
 
بۆچی گرنگە: سیستمی نوێی شۆفێری، شۆفێرانی هەرێمی كوردستان ڕاستەوخۆ بە زانستی هاتووچۆی سەردەم دەبەستێتەوە، هاوكات لەڕێگەی 'ڕێبەری هاتووچۆ' ئاشنا دەبن بە بنەما نێودەوڵەتییەكانی سەلامەتی و دەسكەوتنی زانیاریی لەبارەی فریاگوزاری سەرەتایی و بەكارهێنانی ڕێگاوبان بە شێوازێكی دروست.

لێدوانی فەرمی: هێمن میرانی، بەڕێوەبەری گشتيی دیوانی وەزارەتی ناوخۆ ڕایگەیاند،

- سیستمی نوێی مۆڵەتی شۆفێری وەرچەرخانێكە لەبواری هاتووچۆی كوردستان و دەرئەنجامەكانی لە ساڵانی داهاتوو لەسەر شۆفێرە گەنجەكان دەردەكەون.

- ئەركی هەموو لایێكە لەپێناو پاراستنی گیانی هاونیشتمانییان، ڕێگە نەدرێت بێ مۆڵەتی شۆفێری، بێ ڕاهێنان و بوون بە شوفێرێكی ئاگه‌دار و وریا، بچنە سەر شەقامەکان و ئۆتۆمبێل و ماتۆرسکیل لێبخوڕن.