قەیس محەممەداوی: پاڵەوانانی ئاسایشی کوردستان یارمەتیدەر بوون لە کوشتنی جێگری خەلیفەی داعش

 

ئاڤا نیوز

جێگری فەرماندەی ئۆپەراسیۆنە هاوبەشەکانی عێراق ڕایگەیاند: پاڵەوانانی ئاسایشی هەرێمی کوردستان یارمەتیدەر بوون لە ئۆپەراسیۆنی بە ئامانجگرتنی جێگری خەلیفەی گشتیی داعش، هاوکات ئاشکرای دەکات کە ئاسایشی هەولێر دوای ئەو ئۆپەراسیۆنە پێنج تیرۆریستی دیکەیان دەستگیر کردووە.

چیرۆکی سەرەکی: دەزگای هەواڵگیریی نیشتیمانی بە هاوکاری و هەماهەنگیی فەرماندەیی ئۆپەراسیۆنە هاوبەشەکان، ئەنجوومەنی ئاسایشی هەرێمی کوردستان و هێزەکانی هاوپەیمانی نێودەوڵەتی توانیان عەبدوڵڵا مەکی موسڵیح ڕەفیعی ناسراو بە "ئەبو خەدیجە" بکوژن کە جێگری خەلیفەی ڕێکخراوی داعش بوو، هاوکات والیی عێراق و سووریا و بەرپرسی لیژنەی ڕاسپێردراو و بەرپرسی فەرمانگەکانی ئۆپەراسیۆنی دەرەکیی ئەو ڕێکخراوە بووە.

لێدوانی فەرمی: قەیس محەممەداوی، جێگری فەرماندەی ئۆپەراسیۆنە هاوبەشەکانی عێراق لە کۆنگرەیەکی ڕۆژنامەوانیی ڕایگەیاند: پاڵەوانانی ئاسایشی هەرێمی کوردستان یارمەتیدەر بوون لە ئۆپەراسیۆنی کوشتنی جێگری خەلیفەی گشتیی ڕێکخراوی داعش، ئەوەش لە ڕێگەی ڕادەستکردنی داواکراوێکی نزیک لە جێگری خەلیفە و پێدانی زانیاری و ئاسانکاریکردن لەو بارەیەوە و هەماهەنگییان لەگەڵ هەواڵگری کردووە.

محەممەداوی وتیشی: دوای ئۆپەراسیۆنی کوشتنی والیی عێراق و سووریا ئەئجوومەنی ئاسایشی هەرێـمی کوردستان پێنج تیرۆریستی دیکەی لە هەولێر دەستگیر کرد.